U Biełarusi ŭstupiła ŭ siłu novaja instrukcyja ab prymusovaj evakuacyi aŭtamabila, zaćvierdžanaja pastanovaj Savieta Ministraŭ numar 986 ad 17 kastryčnika 2014 hoda.
carshelp.by
U instrukcyi apisany paradak prymusovaj evakuacyi transpartnych srodkaŭ, raźmiaščeńnia aŭtamabilaŭ na achoŭnuju stajanku, adbuksiroŭki biez raźmiaščeńnia jaho na stajanku, a taksama ahavorany praviły błakiroŭki koła.
Rašeńnie ab prymusovaj adbuksiroŭcy (evakuacyi) transpartnaha srodku i raźmiaščeńni jaho na achoŭnuju stajanku prymajuć supracoŭniki DAI, upaŭnavažanyja składać pratakoły ab administracyjnych pravaparušeńniach. Pry hetym dziaržaŭtainśpiektar abaviazany ahledzieć aŭtamabil u prysutnaści ŭładalnika abo jaho pradstaŭnika (kali haspadar nie znojdzieny, to ŭ prysutnaści nie mienš jak dvuch paniatych) i skłaści adpaviedny pratakoł. Pa mahčymaści robicca fota- abo videazdymka, materyjały jakoj dadajucca da spravy ab administracyjnym pravaparušeńni. Pratakoł składajecca ŭ troch ekzemplarach, pieršy ź jakich zastajecca ŭ supracoŭnika DAI, druhi - na achoŭnaj stajancy, treci pryznačany dla ŭłaśnika transpartnaha srodku.
U instrukcyi adznačana, što dostup uładalnika aŭtamabila abo pradstaŭnika ŭłaśnika da prymusova adbuksiravanaha transpartnaha srodku na stajancy dapuskajecca kruhłasutačna, ale tolki ŭ prysutnaści vartaŭnika stajanki. Mašyna viartajecca ŭładalniku pa pieršym patrabavańni, pryčym admova ŭ suviazi ź nievykanańniem pastanovy ab nakładańni administracyjnaha spahnańnia, niežadańniem płacić za pasłuhi stajanki i evakuatara nie dapuskajecca. Dla atrymańnia aŭto treba mieć pry sabie dakumienty na transpartny srodak i vadzicielskaje paśviedčańnie. Vadzicielam u stanie ałkaholnaha abo narkatyčnaha apjanieńnia mašynu nie viernuć.
Pry viartańni transpartnaha srodku pa patrabavańni ŭłaśnika pavinien być praviedzieny paŭtorny ahlad mašyny, składzieny adpaviedny akt. Apłata pasłuh pa prymusovaj adbuksiroŭcy i zachoŭvańni mašyny ažyćciaŭlajecca ŭ orhanach unutranych spraŭ abo inšaj arhanizacyi, jakoj naležać srodak evakuacyi i achoŭnaja stajanka. U vypadku admovy suma spahaniajecca ŭ sudovym paradku.
Aŭtamabil padlahaje evakuacyi, kali jon źjaŭlajecca pieraškodaj dla inšych transpartnych srodkaŭ, ruchu, raboty transpartu apieratyŭnaha pryznačeńnia abo darožna-ekspłuatacyjnaj, kamunalnaj słužbaŭ.
Pry hetym asoby, jakija pryniali rašeńnie ab evakuacyi, pavinny da adbuksiroŭki pryniać mahčymyja miery pa infarmavańni ŭłaśnika aŭto ab nieabchodnaści ŭstaranieńnia im stvoranaj pieraškody.
Dakumientam taksama praduhledžana: supracoŭnik DAI ŭ vypadkach, ustanoŭlenych zakanadaŭčymi aktami, maje prava ažyćciavić błakiroŭku koła transpartnaha srodku, kali vadziciel nie znachodzicca ŭ transpartnym srodku abo ŭ niepasrednaj blizkaści ad jaho. Błakirujecca piaredniaje levaje koła, kali heta niemahčyma - luboje koła transpartnaha srodku, dostup da jakoha najbolš zručny. Ab błakiroŭcy koła aŭtamabila adrazu ž infarmujecca apieratyŭna-dziažurnaja słužba terytaryjalnaha orhana ŭnutranych spraŭ pa miescy ŭčynieńnia administracyjnaha pravaparušeńnia. Kali błakirujecca nie piaredniaje levaje koła, taksama infarmujecca i ŭładalnik transpartnaha srodku.
Źniaćcie błakiroŭki adbyvajecca ŭ prysutnaści ŭłaśnika aŭto abo ŭpaŭnavažanaj im asoby pa pieršym patrabavańni paśla pradjaŭleńnia dakumientaŭ na mašynu i vadzicielskaha paśviedčańnia.
