Unikalnaja kupiura naminałam 5000 biełaruskich rubloŭ, vystaŭlenaja na internet-aŭkcyjon ay.by, 26 kastryčnika była pradadzienaja za 1580 dalaraŭ. Jaje nabyŭ karystalnik z Rasii pad nikam Vasilij1965.
U kamientarach kalekcyjaniery papiarovych hrošaj nazvali košt rekordny dla biełaruskich banknot. U pracesie aŭkcyjonu staŭki padymalisia vyšej za 1580 dalaraŭ, adnak niekatoryja ź ich byli źniatyja z roznych pryčynaŭ, čaściej za ŭsio z kamientarom «nierealnaja cana».
Kupiura była vystaŭlena na tarhi 26 vieraśnia. «Stan patrapany. Pa centry maleńkaja skraznaja adtulina (praciorta). Nievialikija nadryvy pa bakach», — apisaŭ łot pradaviec pad nikam Bonist.
Za miesiac cana na łot uzrasła bolš čym u tysiaču razoŭ: z 1 da 1580 dalaraŭ.
Kaštoŭnaść banknoty zaklučajecca ŭ jaje redkaj litarnaj sieryi AH.
Jak pisali ŭ kamientarach kalekcyjaniery papiarovych hrošaj, za 14 hadoŭ heta pieršaja vyjaŭlenaja banknota dadzienaj sieryi naminałam 5000 rubloŭ. Pradaviec paviedamiŭ, što atrymaŭ jaje z reštaj kala hoda tamu.
Aŭkcyjon pa prodažy redkaj kupiury nabraŭ amal 30 tysiač prahladaŭ. Staŭki zrabili 14 čałaviek.
