Sustreča prajšła siońnia ŭ Minsku. U joj uziali ŭdzieł 16 jeŭrapiejskich dypłamataŭ i piać apazicyjnych biełaruskich palitykaŭ.
Ź biełaruskaha boku na sustrečy prysutničali lidary kampanii «Havary praŭdu» Uładzimir Niaklajeŭ, ruchu «Za Svabodu» Alaksandr Milinkievič, Abjadnanaj hramadzianskaj partyi (AHP) Anatol Labiedźka, Biełaruskaj partyi levych «Spraviadlivy śviet» Siarhiej Kalakin i sustaršynia arhkamiteta pa stvareńni partyi «Biełaruskaja chryścijanskaja demakratyja» Pavieł Sieviaryniec.
Jak paviedamiŭ Labiedźka, sustrečy ŭ padobnym farmacie nie pravodzilisia z 2010 hoda.
«Napeŭna, heta źviazana z tym, što Łukašenka sprabuje ŭpłyvać na kadravuju palityku ES. Čatyry hady tamu byŭ vielmi mocny padbor dypłamataŭ, jakija źjaŭlalisia nie pradstaŭnictvami niejkich partoŭ ci ekanamičnych kołaŭ, a dypłamatami ŭ poŭnym sensie hetaha słova. Ciapier hetaha, na moj subjektyŭny pohlad, niama», — skazaŭ palityk.
Pavodle słoŭ Labiedźki, padčas siońniašniaj sustrečy zamiežnyja dypłamaty byli hatovyja aktyŭna abmiarkoŭvać ekanamičnyja i handlovyja, ale nie palityčnyja pytańni. Pry hetym jon adznačyŭ, što pradstaŭniki demakratyčnych sił Biełarusi prademanstravali «dosyć kansalidavanuju pazicyju». «Heta važna nie tolki dla apazicyi, ale i dla Biełarusi ŭ cełym. Dla našaj krainy ciapier samaje važnaje — nie vypaści ź mižnarodnaha paradku dnia. Nad hetym treba surjozna dumać i abjadnoŭvać namahańni», — padkreśliŭ palityk.
Na sustrečy, paviedamiŭ jon, abmiarkoŭvałasia «ŭzmacnieńnie hradusu strachu ŭ krainie praź pieraśled uładami palityčnych i hramadskich aktyvistaŭ». «Taksama davałasia acenka ahulnaj situacyi, pierśpiektyŭ jaje raźvićcia, uzajemaadnosin Jeŭrasajuza ź Biełaruśsiu», — raskazaŭ Labiedźka.
«Naša ahulnaje pasłańnie zaklučałasia ŭ tym, što vyrašać situacyju ŭ Biełarusi treba praz sumlennyja i svabodnyja vybary, praz vykanańnie Biełaruśsiu abaviazacielstvaŭ, uziatych u miežach ABSIE. Kali vybary buduć sumlennyja i svabodnyja, my hatovy pryznać ich vyniki, jakija b jany ni byli. Treba stvarać šyrokuju kaalicyju, uździejničać usimi mahčymymi mietadami na biełaruskija ŭłady», — zajaviŭ palityk.
Akramia taho, dadaŭ jon, na sustrečy abmiarkoŭvałasia pytańnie dyjałohu ES z uładami.
«Tut demakratyčnyja siły pa-roznamu aceńvajuć, jaki jon pavinien być, nakolki z Łukašenkam možna vyrašać pytańni. Ale prahučała i mierkavańnie, što nielha dapuskać raniejšych pamyłak, kali ES, mižnarodnyja finansavyja instytuty finansavali kandydata ŭ prezidenty Alaksandra Łukašenku. Heta nie pryvodzić da pieramien, a, naadvarot, kansiervuje situacyju», — adznačyŭ Labiedźka.
Lidar AHP vykazaŭ mierkavańnie, što «nabližeńnie prezidenckaj kampanii budzie pavyšać cikavaść dypłamataŭ da takoha kštałtu sustreč».
