XXI Minski mižnarodny kinafiestyval «Listapad» projdzie ŭ Minsku z 7 pa 14 listapada. U 2014 hodzie fiestyval adznačyŭsia dźviuma asablivaściami.
Pa-pieršaje, aficyjnaje adkryćcio forumu (i pakaz filma adkryćcia) adbudziecca ŭ abnoŭlenym kinateatry «Maskva», a nie ŭ Pałacy Respubliki, dzie raniej tradycyjna pačynaŭsia fiestyval. Pa-druhoje, arhanizatary vyrašyli paradavać hramadzian, jakija pakutujuć ad kulturnaj biessani, i zładzić dla ich načnyja kinapakazy pad nazvaj «Paŭnočnyja straści». Bałazie, takija prajekty, jak «Noč kino» i «Kinanoč», dakazali, što farmat sieansaŭ paśla paŭnočy zapatrabavany ŭ minskich hledačoŭ.
Sieansy dla paŭnočnikaŭ projduć u kinateatry «Centralny» 7, 8 i 14 listapada. Sieansy buduć pačynacca kala paŭnočy i zakančvacca ŭ 6.00 (da ranišniaha hramadskaha transparta). Kab hledačy nie turbavalisia ab tym, jak paśla biassonnaj nočy adpravicca na pracu abo vučobu, načnyja pakazy arhanizavanyja ŭ noč ź piatnicy na subotu i z suboty na niadzielu. Pry hetym nie zabyvajciesia, što filmy, jakija ŭvajšli ŭ načnuju prahramu «Listapada», majuć ŭzrostavyja abmiežavańni. Dy i čas pakazaŭ zusim nie dziciačy. Za adnu kinanoč buduć pakazanyja try filmy ź pierapynkami na paŭhadziny pamiž imi. Heta buduć chity aŭtarskaha kiniematohrafa ŭ samych roznych žanrach. Možna nabyć kvitki jak na ŭsie try načnyja sieansy, tak i na kožny ź ich paasobku. Košt kvitka na adzin film — Br50 tys.
Prahrama pakazaŭ «Paŭnočnych straściej» u kinateatry «Centralny»
U noč z 7 na 8 listapada:
23.30 — DVAJNIK (Vialikabrytanija, 2013), režysior Ryčard Ajoadzi
Film «Dvajnik» — druhaja režysiorskaja praca Ryčarda Ajoadzi. Film źniaty pa matyvach apovieści Fiodara Dastajeŭskaha «Dvajnik». I pieršaj replikaj piersanaža Jaśmin Pejdž u stužcy źjaŭlajecca «Idyjot!», što naŭprost adsyłaje hledačoŭ da nazvy ramana Fiodara Dastajeŭskaha. Zdymki prachodzili ŭ zakinutym ofisie na ŭskrainie Łondana. Karcina atmaśfiernaja, z vyraznymi detalami i adčuvańniem absurdnaści usiaho, što adbyvajecca.
U 1996 hodzie pa «Dvajniku» Dastajeŭskaha chacieŭ źniać film Raman Pałanski. Hałoŭnyja roli ŭ filmie pavinny byli vykanać Džon Travołta, Izabel Adžani i Žan Reno. Zdymki pavinny byli pačacca ŭ Paryžy, ale za niekalki dzion da pačatku prajekta Travołta pasvaryŭsia z Pałanski z-za źmien u scenary i pakinuŭ prajekt. Nieŭzabavie paśla hetaha praca nad filmam była spynienaja.
Siužet: Sajman — ścipły rabaciaha. Na pracy jaho nie zaŭvažajuć, a dziaŭčyna mary ihnaruje. Zdajecca, što tak budzie praciahvacca viečna, ale adnojčy ŭ kantory źjaŭlajecca Džejms, vonkava — dvajnik Sajmana, ale pa charaktary — jaho poŭnaja supraćlehłaść. Džejms upeŭnieny, charyzmatyčny płejboj. Da žachu Sajmana, Džejms pavoli pačynaje zabirać jaho žyćcio.
01.30 — DURNAJA SPRAVA NIACHITRAJA (Narviehija, Šviecyja, Danija, 2014 hod), režysior Chans Pieter Mołand
«Čornaja» kamiedyja na fonie biełaśniežnych piejzažaŭ u pastanoŭcy adnaho ź lepšych režysioraŭ Narviehii Chansa Pietera Mołanda, jaki źjaŭlajecca hodnym paśladoŭnikam tradycyj iranična-brutalnaha kiniematohrafa bratoŭ Koenaŭ i Kviencina Tarancina.
Siužet: Pracavity Niłs kiruje płužnym śniehaačyščalnikam, jaki ačyščaje darohi i hornyja prachody niehaścinnaha abledzianiełaha łandšaftu miascovaści, dzie jon sam žyvie. Zusim niadaŭna jon byŭ pryznany žycharom hoda za svaje namahańni, a ciapier atrymlivaje viestku pra toje, što jaho syn zahinuŭ u vyniku pieradaziroŭki hierainu. Admaŭlajučysia vieryć u praŭdzivaść aficyjnaj viersii śmierci svajho syna, jon pačynaje tajemnaje rasśledavańnie z metaj znajści mierkavanych zabojcaŭ syna. Adnak dalejšyja padziei razhortvajucca samym niepradkazalnym čynam, i jamu davodzicca stać tajamničym hierojem, jaki sieje strach u złačynnym śviecie.
04.00 — TEAREMA ZIERO (Vialikabrytanija, Rumynija, Francyja, ZŠA, 2013), režysior Tery Hilijam
Tery Hilijam apuskaje hledačoŭ u razvažańni starejučaha mužčyny pra sens žyćcia. U filmie pakazany dumki pra śmierć, seksualnyja mary, chviliny refleksii. I pa kožnym z dadzienych punktaŭ pradastaŭlajecca mahčymaść šmatuzroŭnievaj hutarki.
Siužet: Kampjutarny hienij Koen Let bjecca nad nievyrašalnaj tearemaj. Dziakujučy kaściumu dla virtualnaj realnaści jamu ŭdajecca ździejśnić padarožža ŭ schavanuju prastoru i daviedacca tajamnicu svajoj dušy. Hetuju razhadku šukaje nie tolki jon sam, ale i tajamničy Mieniedžmient, jaki kiruje ŭsim śvietam praz usiobačnuju pryładu pad nazvaj ManCams.
U noč z 8 na 9 listapada:
23.40 — U NASTUPNY RAZ Ja BUDU CELIĆ PROSTA Ŭ SERCA (Francyja, 2014 hod), režysior Siedryk Anže
Fiestyvalnaja premjera palicejskaha trylera «U nastupny raz ja budu celić prosta ŭ serca» z Hijomam Kane u hałoŭnaj roli źjaŭlajecca pradmietam asablivaha honaru «Listapada».
Siužet: Alen Łamar — dyscyplinavany palicejski, jakoha šanuje načalstva. Jon viadzie rasśledavańnie sieryi złačynstvaŭ, učynienych mańjakam. Mańjak ŭmieła paźbiahaje pastak, jakija rasstaŭlaje palicyja. Moža być, heta tamu, što mańjak — małady, ścipły palicejski, jaki viadzie cichaje žyćcio i nieprykmietny ŭ kole svaich? Prynamsi, da taho času, pakul jon nie hublaje kartu, dzie paznačanyja ŭsie jaho złačynnyja pryhody…
02.00 — NOVAJA SIABROŬKA (Francyja, 2014 hod), režysior Fransua Azon
Fransua Azon ličycca adnym z samych prykmietnych maładych režysioraŭ «novaj chvali» ŭ Francyi. Jaho filmy charaktaryzujucca vostraj satyraj i svabodnymi pohladami na čałaviečuju seksualnaść. Jon zavajavaŭ mižnarodnuju papularnaść dziakujučy svaim karcinam «8 žančyn» i «Basiejn». Praca «Novaja siabroŭka» maje ŭzrostavaje abmiežavańnie, film rekamiendujecca hladzieć asobam starejšyja za 18 hadoŭ.
Siužet: Kłer pieražyvaje śmierć lepšaj siabroŭki — jany byli nierazłučnyja ź dziacinstva, dzialili radaści i pieražyvańni małalectva, adnačasova vyjšli zamuž. Zabity horam udaviec prapanuje Kłer daścipny sposab vybracca z depresii… Praź niekatory čas Kłer pačynaje zdahadvacca ab tym, što muž jaje zahinułaj siabroŭki sioje-toje chavaje. Jana razumieje, što mužčyna na praciahu mnohich hadoŭ chavaŭ hetuju tajamnicu nie tolki ad navakolnych, ale navat ad svajoj žonki. Niahledziačy na toje, što jaje siabroŭka zahinuła, Kłer stavić pierad saboj zadaču akazać joj apošniuju pasłuhu. Jana pavinna, niahledziačy ni na što, vyvieści na čystuju vadu dziŭnaha ŭdaŭca. Moža być, toje, što daviedajecca dziaŭčyna, dapamoža joj znoŭ zdabyć sens žyćcia?
04.30 — MUŽČYNA, JAKOHA ZANADTA MOCNA KACHALI (Francyja, 2014 hod), režysior Andre Ciešyne
Siužet: Nica, 1976 hod. Paśla niaŭdałaha šlubu Ahnes Le Ru viartajecca z Afryki da maci — uładalnicy Kazino Lo Pale. Maładaja dziaŭčyna zakochvajecca ŭ pryhažuna-jurysta Marysa Aniele, jaki źjaŭlajecca pavieranym ŭ spravach maci. Budučy adnym z akcyjanieraŭ Kazino, Ahnes choča pradać svaju spadčynnuju dolu, kab stać niezaležnaj, ale jaje maci uparta admaŭlajecca. Sa schovišča kazino źnikajuć usie hrošy. Za ŭsim hetym staić Fratani — viortki haspadar kankurujučaha kazino, jaki sprabuje prybrać da ruk Lo Pale. U samy razhar hetaha kanfliktu Marys pierachodzić na bok supiernika i znajomić Ahnes z Fratani, jaki prapanuje joj 3 młn frankaŭ za toje, kab jana prahałasavała suprać svajoj maci. Ahnes zhadžajecca, ale potym škaduje ab svajoj zdradzie, a Marys pakidaje jaje. Paśla sproby samahubstva ŭ kastryčniku 1977 dziaŭčyna źnikaje. Jaje cieła tak i nie budzie znojdziena. Praz tryccać hadoŭ Marys Aniele ŭsio jašče zastajecca hałoŭnym padazravanym u hetym złačynstvie.
U noč z 14 na 15 listapada:
00.00 - DZIAŬČYNA NOČČU HULAJE ADNA (Iran, ZŠA, 2014), režysior i scenaryst Ana Lili Amirpur
Słohan filma abviaščaje: pieršy iranski viestern pra vampiraŭ. U svaim režysiorskim debiucie Ana Lili Amirpur demanstruje zusim nietypovy pohlad na vampirskuju historyju. Film adychodzić ad žanru standartnaj maładziožnaj «strašyłki», u im złučajucca chorar, pulp, hrafičnaja naveła i siurrealizm u duchu Linča. Da filma ŭ Iranie ŭžo vypuščany komiks-prykvieł.
Siužet: Padziei razhortvajucca ŭ vydumanym iranskim horadzie Bed Sici, poŭnym prastytucyi i złačynstvaŭ, śmierci i adzinoty. Tut žyvuć vampiry, prastytutki, narkamany, suteniory, lichviary i, viadoma ž, ułasny iranski Džejms Dyn.
02.00 — CARSTVA PRYHAŽOŚCI (Kanada, 2014 hod), režysior Deni Arkan
Siužet: Luk — bliskučy małady architektar, čyj talent jašče nie pryznali. Jon miarkuje, što ŭ jaho idealnaje žyćcio. U Luka šykoŭny dom, jaki znachodzicca ŭ malaŭničaj miascovaści, žonka, jakaja vałodaje nievierahodnaj pryhažościu i pracuje spartovym instruktaram, i addanyja siabry, jakija padzialajuć jaho zachapleńni — palavańnie, katańnie na łyžach i mnohaje inšaje. Ale adnojčy na simpoziumie architektaraŭ u Taronta jon sustrakaje tajamničuju dziaŭčynu pa imi Lindsej, jakaja źmienić jaho žyćcio…
04.00 — DOM RASPUSTY (Francyja, 2011 hod), režysior Biertran Baneło
Siužet: Pačatak XX stahodździa. Paryžski publičny dom dažyvaje apošnija dni. Doŭhi šnar na tvary adnoj z prastytutak — niby trahičnaja ŭśmieška. U hetym adharodžanym ścienami zakrytym śviecie, niabačnym z boku, adbyvajecca cełaje žyćcio: mužčyny zakochvajucca ci nienavidziać, a žančyny dzielać radaści, smutki, strachi i sakrety…
***
Cyrymonii adkryćcia i zakryćcia «Listapada» ŭ 2014 hodzie projduć u zale kinateatra «Maskva». Realizavany budzie abmiežavany lik kvitkoŭ pa canie Br100 tys. Asnoŭnymi placoŭkami dla pakazaŭ stanuć: «Maskva», «Centralny», «Pieramoha», «Pijanier», «Mir» i Dom kino. Stužki, jakija ŭvajšli ŭ asnoŭny konkurs ihravoha kino «Listapada», pa tradycyi pakažuć u kinateatry «Centralny», košt kvitka — da Br40 tys. Filmy — udzielniki asnoŭnaha konkursu nieihravoha kino možna ŭbačyć u kinateatry «Mir», košt kvitka — da Br15 tys. Samyja tannyja kvitki — Br5 tys. — na dzionnyja sieansy ŭ kinateatry «Pijanier», dzie projduć pakazy, raźličanyja na dziciača-junackuju aŭdytoryju. Film adkryćcia «Ja nie viarnusia» z 13 listapada budzie ŭ prakacie. Praz tydzień paśla fiestyvala samyja cikavyja karciny buduć pakazanyja ŭ kinateatry «Pieramoha». Pryjemnaha prahladu!
