Pamiataju, jak my ź siabrami ŭ Śvietłahorsku zachaplalisia Jeŭramajdanam. I nichto z nas tady i padumać nie moh, čym heta skončycca dla Ukrainy. Na žal, nie tolki my apynulisia ŭ stanoviščy ślapych kacianiataŭ. Navat chvalonyja CRU i «Masad» šalonuju avanturu Pucina praspali. Nie chočacca dumać, što nie praspali, a śviadoma prynieśli ŭ achviaru, dazvolili rastrybušyć Ukrainu…
Palityka, jakuju Rasija pravodzić u adnosinach da słabiejšych, — svałačnaja. Rasija, majučy bieźlič ahientaŭ upłyvu va Ukrainie, dazvalała svajmu vasału Janukoviču raskradać dziaržavu.
Razburyli siłavyja struktury, daviali armiju da straty bajazdolnaści. I zasłali svaich śpiacoŭ-pravakataraŭ, usich hetych hoblinaŭ, hirkinych, baradajaŭ u Krym i Danbas.
U svoj čas, kali Ukraina admoviłasia ad jadziernaj zbroi, byŭ padpisany Budapiešcki miemarandum, zhodna ź jakim harantami biaśpieki i terytaryjalnaj cełasnaści Ukrainy vystupili Rasija, ZŠA i Vialikabrytanija. Jakim harantam akazałasia Rasija, usim viadoma. A kudy hladzieli i što rabili druhija dva haranty? Čamu, jak tolki pačałasia avantura ŭ Krymie, imi — harantami — nie była nadziejna prykryta rasijska-ŭkrainskaja miaža? Čamu paśla masavaj pierakidki rasijskaj braniatechniki amierykanskija bieśpiłotniki nie źniščajuć hetyja tanki i BTRy, jak tolki tyja pierasiakuć miažu Ukrainy?
Čamu demakratyčnaja Francyja źbirajecca pieradać Rasii zvyšsučasny viertalotanosiec «Mistral»? Pa-dobramu, budavać ich treba, ale pieradać nie ahresaru — Rasii, a Ukrainie, jakaja viadzie niaroŭnuju baraćbu z ahresijaj!
Razumieju, heta kaštuje hrošaj, i nie małych. Ale ž kali davieści da Treciaj suśvietnaj, heta abydziecca nievymierna daražej! A kali ahresar pahłynie Ukrainu — Treciaja suśvietnaja stanie niepaźbiežnaj.
Banda pavažaje tolki siłu!
Tak, na Rasiju nakładzieny peŭnyja sankcyi. Ale «Vaśka słušajet da jest». Časam ad abvieščanych sankcyj stanovicca prosta śmiešna. Sankcyi až na 170 asobaŭ!? A rasijsija ŚMI — hety «kalektyŭny Hiebiels» — až zachlipajecca va ŭchvaleńni dziejańniaŭ Pucina. A «pipł», jak kažuć, «chavaje».
A novym ukrainskim uładam varta było b ustanavić takija ceny na vadu i elektryčnaść dla Kryma, jakimi Ukraina pa-raniejšamu zabiaśpiečvaje hety rehijon, kab jany całkam zabiaśpiečyli kampiensacyju śpiekulatyŭnych cen za rasijski haz, jakija załamvaje «Hazprom».
Trymajciesia, ukraincy! Dobryja ludzi ŭ Biełarusi i cełym śviecie dobra razumiejuć sutnaść padziej i padtrymlivajuć vas.
