Eks-prezident SSSR Michaił Harbačoŭ byŭ haračym prychilnikam kultavaha sieryjała pačatku 1990-ch «Tvin Piks» i navat sprabavaŭ vyśvietlić, chto zabiŭ Łoru Pałmier u eks-prezidenta ZŠA Džordža Buša-starejšaha.
Pra sprobu Harbačova vyśvietlić praz Buša kancoŭku filma ŭ režysiora filma Devida Linča raspaviadaje piśmieńnik i žurnalist Bred Dźjuks u miemuarach «Razvažańni: vusnaja historyja «Tvin Piks», uryvak ź jakich apublikavaŭ u Twitter kampazitar i muzykant Rajn Chamiłtan Uołš.
U apublikavanym u mikrabłohu ŭryŭku pryvodziacca słovy Džułsa Chajmavitca — tahačasnaha kiraŭnika telekampanii Spelling Entertainment, jaki kuryravaŭ napisańnie scenaryja dla «Tvin Piks».
Nie ŭ kursie
Jon zhadvaje, jak jamu patelefanavaŭ telepradziusier Aaran Śpiellinha z pytańniem, chto zabiŭ Łoru Pałmier.
«Nie maju paniaćcia», — adkazaŭ Chajmavitc, patelefanavaŭ režysioru sieryjała Devidu Linču i zadaŭ jamu toje ž pytańnie. Linč adkazać admoviŭsia.
Śpiellinh patelefanavaŭ znoŭ z tym ža pytańniem, skazaŭšy, što «heta vielmi važna».
Jak akazałasia, jamu zadavaŭ hetaje pytańnie finansist, jaki ciesna mieŭ znosiny z prezidentam Bušam, u jakoha ŭ svaju čarhu na hetuju temu cikaviŭsia saviecki lidar.
Chajmavitc patelefanavaŭ Linču znoŭ i skazaŭ: «Ty pavinien mnie skazać, chto zabojca Łory Pałmier».
«Voś tady ja i zrazumieŭ, što Devid sam, kaniečnie, nie maje paniaćcia, chto zabiŭ Łoru Pałmier», — skončyŭ svoj apoviad Chajmavitc.
***
Mistyčny cieryjał-drama pra rasśledavańnie zabojstva ŭ nievialikim amierykanskim miastečku staršakłaśnicy Łory Pałmier vychodziŭ na ekrany ŭ 1990-1991 hadach.
U pačatku kastryčnika 2014 h. Linč raspavioŭ prychilnikam, što zdymie praciah sieryjała. Treci siezon budzie składacca ź dzieviaci sieryj i vyjdzie ŭ 2016 hodzie na amierykanskim kanale Showtime.
