Sierbija pakul nie stała ŭvodzić sankcyi suprać Rasii dla ŭstupleńnia ŭ Jeŭrasajuz, adnak kraina nie vyklučaje ŭ budučyni mahčymaści ŭzhadnieńnia pazicyi ź ES. Pra heta ŭ čaćvier, 20 listapada, zajaviŭ pasoł Sierbii ŭ Rasii Słavienka Terzič.
«Pazicyja Sierbii takaja, što jana nie choča dałučacca da sankcyj suprać Rasii. U toj ža čas Sierbija viadzie pieramovy ź ES (pa ŭstupleńni ŭ Jeŭrasajuz), jakija, miarkujučy pa ŭsim, nie buduć takimi prostymi i lohkimi. Sierbija, napeŭna, pastupova pavinna budzie ŭzhadniać svaju pazicyju z pazycyjaj ES pa roznych mižnarodnych pytańniach, ale na siońniašni dzień nie hatovaja dałučacca da sankcyj suprać RF pa mnohich pryčynach, u tym liku tamu, što Sierbija i Rasija źjaŭlajucca histaryčnymi sajuźnikami», — skazaŭ jon.
19 listapada jeŭrakamisar pa jeŭrapiejskaj palitycy susiedstva i pašyreńnia Jochanes Chan daŭ intervju sierbskaj haziecie «Viečiernije novosti», u jakim jon raspavioŭ, što Sierbii daviadziecca ŭvieści sankcyi suprać Rasii, kab trapić u Jeŭrasajuz.
Sierbija stała aficyjnym kandydatam na ŭstupleńnie ŭ ES 1 sakavika 2012. Pieramovy pa padpisańni pahadnieńnia pačalisia ŭ pačatku 2014-ha. Raniej premjer krainy Alaksandr Vučyč zajaviŭ, što kraina nie budzie zajmać antyrasijskuju pazicyju z-za situacyi na paŭdniovym uschodzie Ukrainy.
