Finskija kulamiotčyki sustrakajuć bratoŭ z Uschodu.
Litva, Łatvija i Estonija zdalisia Savieckamu Sajuzu biez boju. Nastupnaj, pavodle pakta Mołatava-Rybientropa, musiła stać Finlandyja. Adnak finskija palityčnyja i vajskovyja elity rašylisia na supraciŭleńnie. Finlandyja paśpieła padrychtavać armiju, a bolšaja stratehičnaja hłybinia krainy i šviedskaje zaplečča dazvolić vybudavać abaronu.
U kastryčniku SSSR patrabuje ad finaŭ značnych palityčnych i terytaryjalnych sastupak i źniščeńnia abarončych umacavańniaŭ na saviecka-finskaj miažy. Adnačasova savieckija vojski pačali kancentravacca ŭ prylehłych da Finlandyi rajonach.
Finski ŭrad pahadžaŭsia na peŭnyja terytaryjalnyja sastupki, kab zachavać mir. I kali b jany byli pryniatyja, to, naprykład, adlehłaść ad finskaj miažy da Leninhrada vyrasła b u 2 razy!
Adnak, SSSR nie patrebnyja byli sastupki — jany chacieli dazvołu na ŭviadzieńnie armii ŭnutr Finlandyi, što adniało b u finaŭ, jak paźniej u estoncaŭ i litoŭcaŭ, mahčymaści dla supraciŭleńnia.
U hety čas savieckaja hrupoŭka, nacelenaja suprać Finlandyi, naličvała bolš za 425 000 čałaviek, 2900 harmat i minamiotaŭ, 2300 tankaŭ, 2400 samalotaŭ. Heta našmat bolš, čym Rasija mieła ŭ Krymie i Danbasie ŭ 2014-m.
Usie finskija ŭzbrojenyja siły paśla častkovaj mabilizacyi naličvali 265 000 čałaviek, 534 harmaty, 26 tankaŭ, 270 samalotaŭ.
26 listapada 1939 hoda niekalki vybuchaŭ prahučali ŭ vioscy Majniła, jakaja znachodziłasia na savieckim baku finska-savieckaj miažy. Byccam by zahinuła niekalki savieckich žaŭnieraŭ. SSSR adrazu abvinavaciŭ Finlandyju ŭ złačynstvie i patrabavaŭ novych sastupak. Finlandyja abvierhła svaju vinu, prapanavała advieści ad miažy i savieckija, i finskija vojski. Prapanavała arhanizavać sumiesnuju kamisiju, jakaja b vyvučyła incydent u Majnile. Nivodnaja z hetych prapanovaŭ nie była pryniataja.
Apublikavanyja 20 hod tamu dakumienty śviedčać, što raskvataravany tam saviecki 68 strałkovy połk 70 strałkovaj dyvizii nie panios tady nijakich strat. Paźniej Mikita Chruščoŭ raskaža, što abstreł u Majnile byŭ arhanizavany kamandarmam Ryhoram Kulikom.
SSSR razarvaŭ pakt ab nienapadzieńni ź Finlandyjaj. 30 listapada savieckija vojski pačali nastup uhłyb finskaj terytoryi.
Ale jašče 11 listapada 1939 hoda ŭ Leninhradskaj vajennaj akruzie pačałosia farmavańnie tak zvanaj «Finskaj narodnaj armii». U dzień pravakacyi ŭ Majnile ŭ «1 korpusie Finskaj narodnaj armii» słužyli ŭžo 13405 čałaviek — u «FNA» zapisvali najpierš čyrvonaarmiejcaŭ finskaha i karelskaha pachodžańnia.
13 listapada pačałosia stvareńnie i «finskaha narodnaha ŭrada», jaki musiŭ dapamahčy Stalinu pastavić Finlandyju pad kantrol paśla taho, jak savieckija častki razabjuć finaŭ.
Dyrektyvu pra pačatak bajavych dziejańniaŭ suprać Finlandyi Vajennaja Rada Leninhradskaj vajskovaj akruhi addała jašče 21 listapada — za piać dzion da «złačynnych dziejańniaŭ finskaj vajenščyny»…
Praŭda, supraciŭ finaŭ pryvioŭ da taho, što i «FNA», i «narodny ŭrad» zastalisia tolki prapahandysckimi fikcyjami i byli cicha raspuščanyja paśla niepaśpiachovaj dla SSSR vajny.
Saviecka-finskaja vajna skončycca 13 sakavika 1940 hoda, Finlandyja ź niejmaviernaj stojkaściu adstaić niezaležnaść. Dziakujučy tamu hieraizmu, siońnia Finlandyja pa ŭzroŭni žyćci bližejšaja da Šviecyi i Danii, a nie da Rasii. Hledziačy na finaŭ, razumiejem, jakoj mahła b stać Biełaruś, kab raniej zdabyła niezaležnaść.
Pieśnia kabare Njet, Molotov! pryśviečanaja padziejam toj vajny. U pieśni kpiać z Mołatava i jahonaha ŭltymatumu finam. Jaho paraŭnoŭvajuć z rasijskim hienierał-hubiernataram Bobrykavym, jaki pravodziŭ u Finlandyi XIX st. rusifikacyju (anałaham našaha Muraŭjova). Za Urał adpravim Mołatava, palitrukoŭ, kamisaraŭ i pietrazavodskuju šušaru, śpiavajecca ŭ pieśni. Pieršyja vykanańni jaje na radyjo «Chielsinki» ŭ časie vajny prachodzili ŭžyvuju.
