Viadomy ŭkrainski hurt pryjedzie 5 śniežnia dla taho, kab pavinšavać z 15-hodździem svaich kalehaŭ z hurtu Sciana.
«Biełaruś – zacišnaja i miłaja kraina, u jakuju pryjechać zaŭždy radasna», – kaža lidar kamandy z Chiersonu Dźmitro Ihnataŭ. Cikava, što sam jon pracuje advakatam, maje ŭłasnuju jurydyčnuju kantoru, a ŭvieś volny čas pryśviačaje muzycy. Jaho hurt «Rolliks» staŭ užo brendam alternatyŭnaj ukrainskaj sceny. Jany majuć u darobku dva albomy, dziasiatak klipaŭ, solnyja kancerty dy vystupy ŭ jakaści haściej na najbujniejšych ukrainskich festach. Ciapier hurt rychtuje novy albom. Ich novyja pieśni i viadomyja chity možna budzie pačuć na śviatkavańni 15-hodździe hurta Sciana, ź jakim ukraincaŭ źviazvajuć tryvałyja siabroŭskija pačućci.
«Rolliks» i Sciana paznajomilisia na feście «Zachid», niekalki hod tamu mieli supolny tur pa Ukrainie i Biełarusi i zapisali razam trek «Biełaruś-Ukrajina». U Minsku hości vystupiać z 45-chvilinnym setam 5 śniežnia ŭ kłubie «Piraty».
