Raniejšyja rasijskija ŭładalniki vyrašyli zharnuć rekanstrukcyju i admovilisia ad prava arendy.
11 listapada adbyŭsia aŭkcyjon, jaki vyjhrała TAA «Pachłava». Kampaniju z takoj nazvaj udałosia znajści tolki ŭ Sankt-Pieciarburhu, ale ŭsie kantaktnyja dadzienyja zakrytyja.
Viadoma tolki, što asnoŭnym vidam dziejnaści «Pachłavy» źjaŭlajecca roźničny handal praduktami, uklučajučy napoi, i tytuniovymi vyrabami ŭ śpiecyjalizavanych kramach. Kampaniju ŭznačalvaje Alijeŭ Kiazym Mamied Ahły.
Kancert u «Reaktary». Fota: whereminsk.by
Źviazacca ź im i daviedacca, ci zastaniecca sam kłub, abo na jaho miescy adčynicca čarhovaje kazino ci krama ŭschodnich prysmakaŭ, pakul nie ŭdałosia. Budynak «Reaktara» pa-raniejšamu začynieny, unutry niama ni vartaŭnikoŭ, ni rabočych.
Prajaśnić situacyju nie zdoleŭ i kiraŭnik adździeła architektury i budaŭnictva Savieckaha rajona Minska Ivan Mikuła, jaki admoviŭsia razmaŭlać na temu «Reaktara».
Apošniaje mierapryjemstva ŭ kultavym minskim kłubie prajšło ŭ traŭni 2011 hoda, paśla čaho ŭstanova była zakrytaja na ramont.
Na toj momant uładalniki kłuba abiacali zrabić placoŭku bolš utulnaj i sučasnaj.
Paźniej stała viadoma, što kłub vykupleny rasijskimi biznesoŭcami. Spačatku tam vialisia aktyŭnyja pracy. Pahavorvali, što placoŭka čakaje darahoha abstalavańnia z Łondana. Potym źjaviłasia infarmacyja, što z «Reaktara» robiać kazino.
U 2013 hodzie prava arendy «Reaktara» na 10 hadoŭ było vystaŭlenaje na prodaž za 900 tysiač dołaraŭ. Ahienty paviedamlali, što tam na 80 adsotkaŭ zrobleny ramont, pastaŭlenaja darahaja sistema vientylacyi, zroblenaja akustyka stoli.
