fota z Twitter prezidenta Ukrainy
U čas sustrečy z vajskoŭcami, jakija abaraniajuć Daniecki aeraport, prezident Ukrainy Piatro Parašenka ŭručyŭ pašpart hramadzianina Ukrainy biełarusu Siarhieju Karatkich, jaki vajuje ŭ składzie bataljona «Azoŭ» z samaha pačatku jaho stvareńnia i źjaŭlajecca kamandziram raźviedki.
Prezident padziakavaŭ Siarhieju Karatkich za mužnuju i addanuju słužbu. «Być hramadzianinam Ukrainy stała modna, prestyžna, ja hanarusia hetym i z zadavalnieńniem ŭručaju Vam pašpart hramadzianina Ukrainy», — skazaŭ Piatro Parašenka, źviartajučysia da voina. Pavodle słoŭ kiraŭnika dziaržavy, «najlepšyja našy voiny, najlepšyja vałanciory, jakija prademanstravali, što jany na ruskaj, biełaruskaj, anhlijskaj ci luboj inšaj movie lubiać Ukrainu nie mienš, čym jaje lubiać na ŭkrainskaj, jakija hatovyja addać svajo žyćcio za jaje niezaležnaść, vartyja nasić vialikaje i hanarovaje zvańnie hramadzianina Ukrainy».
Siarhiej Karatkich padziakavaŭ prezidentu słovami ŭkrainskich voinaŭ «Słužu narodu Ukrainy». Paśla ŭznaharodžańnia bajec adznačyŭ taksama, što jon rodam z Rasii, doŭhi čas byŭ hramadzianinam Biełarusi. «Ja vielmi rady, što atrymaŭ hramadzianstva Ukrainy. Ja da hetaha išoŭ vosiem miesiacaŭ», — skazaŭ jon.
Pa słovach Siarhieja Karatkich, usie hladziać rasijskija telekanały, i bolšaść ludziej razumiejuć, što toje, što adbyvajecca va Ukrainie, moža paŭtarycca ŭ Biełarusi, Kazachstanie, Łatvii.
Raniej niekalki vałancioraŭ i dobraachvotnikaŭ źviarnulisia da kiraŭnika dziaržavy z prośbaj pryniać Siarhieja Karatkich va ŭkrainskaje hramadzianstva. Kamisija pa pytańniach hramadzianstva pry prezidencie razhledzieła hetyja zvaroty i stanoŭča vyrašyła pytańnie.
Parašenka taksama dadaŭ, kažučy pra Daniecki aeraport, što «ja ŭpeŭnieny, što my tam abaraniajem ŭsiu Ukrainu. Zdadzim «Danieck» — vorah budzie ŭ Baryspali [aeraport kala Kijeva], abo ŭ Hastomieli [kala Kijeva], abo ŭ Lvovie».
Radyjo Svaboda piša, što Siarhiej Karatkich naradziŭsia ŭ Rasii ŭ 1969 hodzie. Ale jon hramadzianin Biełarusi. U Rasii jon viadomy jak adzin z kiraŭnikoŭ ekstremisckaj arhanizacyi «Nacyjanalna-sacyjalistyčnaja supolnaść». Praŭda, adtul jaho «vyhnali» za škodu arhanizacyi.
Ź siaredziny 2000-ch jahonaje proźvišča najčaściej sustrakałasia pobač ź imiem skandalna viadomaha nieanacysta Maksima Marcinkieviča (Ciesaka).
U Biełarusi Maluta ŭvachodziŭ u nieanacyskuju arhanizacyju Ruskaje nacyjanalnaje adzinstva (RNIE), infiltravanuju rasijskimi śpiecsłužbami.
I pryvioŭ jaho ŭ hetuju arhanizacyju Valer Ihnatovič, paźniej asudžany za vykradańnie i zabojstva teležurnalista Źmitra Zavadskaha. Ihnatoviča taksama źviazvali ź biełaruskim «eskadronam śmierci», jaki vykraŭ u tym liku lidaraŭ apazicyi Hančara i Zavadskaha.
U Rasii chadzili — ci raspuskalisia — čutki pra toje, što Maluta — ahient FSB.
Akramia taho, Malutu ličyli arhanizataram vybuchu na Maniežnaj płoščy ŭ 2007 hodzie.
U 2013 hodzie Maluta braŭ udzieł u napadzie z nažom na troch antyfašystaŭ u Minsku i paźbieh adkaznaści.
Paplečnik adyjoznaha rasijskaha nacyjanalista Maksima Marcinkieviča (Ciesaka) dziŭnym čynam unikaje pakarańnia jak u Biełarusi, tak i ŭ Rasii, choć nie raz pryciahvaŭsia pa roznych kryminalnych spravach.
Były śledčy biełaruskaj prakuratury Dźmitryj Pietruškievič, jaki raskryŭ hramadskaści dakumienty pa spravach ab źniknieńni lidaraŭ apazicyi, zajaŭlaŭ, što Malutu jašče z časoŭ jahonaj aktyŭnaści ŭ RNIE «kryšuje» KDB.
I voś ciapier Maluta ŭspłyŭ u bataljonie, jaki byŭ na pieradavoj bajoŭ z rasijskimi i prarasijskimi siłami ŭ Danbasie.
