U Rasii pry ŭdziele pravasłaŭnaha duchavienstva centralizavana farmujucca vajenizavanyja hrupy dobraachvotnikaŭ dla zakidu na terytoryju Danieckaj i Łuhanskaj abłaściej.
Niahledziačy na stałyja zapeŭnivańni rasijskaha palityčnaha i carkoŭnaha kiraŭnictva ab niejtralitecie adnosna vajennaha supraćstajańnia na terytoryi Ukrainy, u Rasijskaj Fiederacyi pry ŭdziele pravasłaŭnaha duchavienstva centralizavana farmujucca vajenizavanyja hrupy dobraachvotnikaŭ dla zakidu na terytoryju Danieckaj i Łuhanskaj abłaściej, paviedamlajecca ŭ siensacyjnym videarepartažy Taćciany Korniavaj i Aleha Mutaŭkina na Tomskim telekanale TV2.
«Pieršaja hrupa dobraachvotnikaŭ adpraviłasia siońnia z Tomska ŭ Łuhanskuju vobłaść», — havorycca ŭ repartažy rasijskich teležurnalistaŭ, apublikavanym 7 śniežnia 2014.
Hrupa składajecca z 31 čałavieka va ŭzroście ad 23 da 50 hadoŭ, mnohija prajšli Afhanistan i Čačniu. Arhanizavaŭ adpraŭku ŭsierasijski Sajuz vieteranaŭ Afhanistana. Pa infarmacyi žurnalistaŭ, ciapier takija atrady dobraachvotnikaŭ adpraŭlajucca va Ukrainu z usioj Sibiry. Naprykład, u repartažy zhadvajecca, što z Barnauła na Danbas pajechała hrupa z 200 čałaviek.
Padrychtavali tomski atrad, jak paviedamlajecca, na hrošy sponsaraŭ. Dobraachvotnikaŭ błasłaŭlaje pravasłaŭny śviatar, jaki razdaje im abrazki, z pramovami vystupajuć aficery. Adpraŭka na rasijska-ŭkrainskuju miažu ažyćciaŭlajecca arhanizavana — usich pieravoziać aŭtobusami.
«Kryŭdna za našych. Što niejkaja … dazvalaje sabie zabivać dziaciej i ciažarnych žančyn. My nie možam na heta hladzieć» — kaža adzin z dobraachvotnikaŭ z Tomska, jakija nakiroŭvajucca ŭ Łuhansk: «My zajmalisia, my treniravalisia, my rychtavalisia. I, paviercie, my padrychtavalisia vielmi dobra. My nie jedziem tudy zarabić. My jedziem tudy, kab skončyć usio heta, ichniaje hetaje biaspraŭje»
Michaił Kałmakoŭ, staršynia praŭleńnia «Rasijskaha sajuza vieteranaŭ Afhanistana», pryznaŭ, što «vielmi šmat chłopcaŭ pajechała tudy paasobku, i ŭžo niekatoryja viartajucca, tamu było pryniataje rašeńnie centralizavana nakiravać hrupu». Ź joj budzie padtrymlivacca suviaź u Rasii.
«Z hetaj prapanovaj u maštabie Rasijskaj Fiederacyi vyjšli «Rasijski sajuz vieteranaŭ Afhanistana», «Sajuz desantnikaŭ Rasii» i «Bajavoje braterstva», — zajaŭlaje Kałmakoŭ.
Pavodle jaho, inicyjatyva była uchvalenaja na samym vysokim uzroŭni:
«Aficyjna naša kiraŭnictva z Krasnaj Płoščy ab hetym zajaviła pa centralnych kanałach, što sapraŭdy treba akazać dapamohu narodam Łuhanskaj i Danieckaj respubliki. Z usich faktyčna sibirskich rehijonaŭ našy chłopcy tudy pajechali».
«Toje, što adbyvajecca, zdajecca nierealnym, bo aficyjna rasijanie na čužoj vajnie ŭ čužoj krainie nie vajujuć» — dajucca dzivu žurnalisty. «Mahčyma, što novy atrad dobraachvotnikaŭ z Tomska pajedzie va Ukrainu ŭžo paśla Novaha hoda» — paviedamlajecca ŭ repartažy. Dobraachvotniki śćviardžajuć, što nie admaŭlajucca ad materyjalnaha ŭznaharodžańnia za vajennuju dapamohu, ale i nie patrabujuć jaho.
Na siońnia, pavodle artykuła 359 Kryminalnaha kodeksa RF «najmictva», «viarboŭka, navučańnie, finansavańnie ci inšaje materyjalnaje zabieśpiačeńnie najmita, a roŭna jaho vykarystańnie va ŭzbrojenym kanflikcie abo vajennych dziejańniach — karajucca pazbaŭleńniem voli na termin ad čatyroch da vaśmi hadoŭ z abmiežavańniem voli na termin da dvuch hadoŭ albo biez takoha… Udzieł najmita va ŭzbrojenym kanflikcie abo vajennych dziejańniach — karajecca pazbaŭleńniem voli na termin ad troch da siami hadoŭ z abmiežavańniem voli na termin da adnaho hoda albo biez takoha».
Na pytańnie pra mahčymy kryminalny pieraśled za vajennyja dziejańni na terytoryi inšaj dziaržavy adzin z dobraachvotnikaŭ adkazaŭ, što siarod rasijskich deputataŭ razhladajecca pytańnie ab nadzialeńni rasijskich dobraachvotnikaŭ aficyjnym statusam.
Dadzieny siužet taksama užo paśpieŭ vyklikać rezanans u hłabalnym siecivie. Tak, jaho prakamientavaŭ rasiejski apazicyjanier Barys Niamcoŭ:
«Pucin raspaviadaje Ałandu pra mirny praces na Danbasie, a sam praciahvaje adpraŭlać ruskich zabivać ŭkraincaŭ. Ciapier centralizavana praz «Sajuz vieteranaŭ Afhanistana», «Sajuz desantnikaŭ Rasii» i «Bajavoje braterstva».
Pahladzicie repartaž z Tomska. Viadoma, što ŭsie hetyja vieteranskija arhanizacyi znachodziacca pad apiekaj Ministerstva abarony i atrymlivajuć ad Šajhu surjoznuju padtrymku. U mabilizacyi «dobraachvotnikaŭ», jakija jeduć zabivać, najvažniejšuju rolu adyhryvajuć fiederalnyja TB. Bieź nianaviści da niekali brackaha naroda nichto nie pajedzie.
Nianaviść treba pastajanna raspalvać… Vajna skončycca roŭna tady, kali dziaržTB pamianiaje karcinku, viarnuŭšysia ŭ Rasiju».
Adnak paśla hetaha staršynia centralnaha praŭleńnia Rasijskaha Sajuza vieteranaŭ Afhanistana Alaksandr Razumaŭ raźmiaściŭ na sajcie svajoj arhanizacyi adkaz Barysu Niamcovu, jaki datavany čamuści 12 žniŭnia 2014.
Lider rasijskich «afhancaŭ» abvinavaciŭ Barysa Niamcova ŭ «čarhovym paklopie i rusafobskim tryźnieńni ŭ abaronu ŭkrainskich karnikaŭ».
Jon śćviardžaje, što havorka ŭ videasiužecie «idzie zusim pra inšaje, a mienavita pra toje, što kala 200 dobraachvotnikaŭ, u tym liku, členaŭ hramadskich arhanizacyj «Rasijski Sajuz vieteranaŭ Afhanistana», «Bajavoje braterstva», «Sajuz desantnikaŭ Rasii», adpraŭlajucca na Danbas abaraniać kaštoŭnaści ruskaha śvietu i mirnaje nasielnictva paŭdniovaha Uschodu Ukrainy ad ukrainskich nieafašystaŭ».
