Žychara h. Baranavičy Źmitra Pałojku zatrymali na vakzale pa pryjeździe z Ukrainy 4 śniežnia i asudzili na 10 sutak za drobnaje chulihanstva. Jak miarkujecca, chłopiec słužyŭ u bataljonie «Danbas» i tamu byŭ zatrymany ŭ Biełarusi.
Źmicier Pałojka pracuje zvarščykam. Fota z sajta VKontaktie
Intex-press źviazałasia ź niaviestaj Źmitra — Vitaj, jakaja žyvie va Ukrainie ŭ horadzie Kurachava Danieckaj vobłaści. Jany paznajomilisia letam praź internet, jon niekalki razoŭ pryjazdžaŭ da jaje va Ukrainu, i ciapier Vita sa Źmitrom vyrašyli ažanicca.
Žančyna raspaviała, što Dźmitryj pajechaŭ u Baranavičy, kab pradać kvateru.
— My źbirajemsia ažanicca, i jon chacieŭ mieć niejkija srodki dla taho, kab pačać žyć va Ukrainie, — tłumačyć Vita. — Va Ukrainie ciapier idzie vajna, usim ciažka, i Źmicier ličyŭ, što lišnija hrošy nam nie pieraškodziać. Jon znajšoŭ pakupnika, damoviŭsia pra canu i pajechaŭ u Baranavičy afarmlać dakumienty.
Pa pryjeździe ŭ Baranavičy 8 śniežnia Źmitra Pałojku zatrymali adrazu na vakzale. Jon paśpieŭ patelefanavać Vicie i skazać, što jaho zabirajuć u milicyju.
«Paviedami ŭsim, što ŭ Biełarusi žanicca z ukrainkami zabaroniena», — apošniaje, što pačuła Vita ad Źmitra.
— U nas vajna idzie, a takoha biazładździa niama, — uzdychaje žančyna.
Paźniej Vicie patelefanavaŭ čałaviek, jaki siadzieŭ razam sa Źmitrom u SIZA, i raspavioŭ, što milicyja paśla zatrymańnia pieradała chłopca KDB, a tyja ŭ chutkim časie viarnuli jaho nazad milicyi. Sud prysudziŭ Źmitra Pałojku da 10 sutak aryštu za drobnaje chulihanstva.
U KDB paviedamili, što ničoha nie mohuć skazać ab zatrymańni Pałojki.
Biełaruskija vydańni vykazali zdahadku, što čałaviek pa proźviščy Pałojka słužyŭ u bataljonie «Danieck» i, mabyć, tamu chłopiec byŭ zatrymany ŭ Biełarusi.
Vita hetamu ździŭlenaja, jana ličyć, «mahčyma, Źmicier vypadkova trapiŭ u kadr». Pa słovach žančyny, horad Kurachava, dzie jana žyvie, znachodzicca za 18 km ad zony ATA i za 30 km ad danieckaha aeraporta. Vita raspaviała, što kananada ŭ horadzie čutnaja amal kožny dzień, byvaje, i škło ad vybuchaŭ rassypajecca: «Hrady laciać nad hałovami, ale my ŭžo ŭsie pryvykli».
— U nas u horadzie vielmi šmat vajskoŭcaŭ: «Danbas», «Azoŭ», «Pravyja siektary» roznyja, technika jeździć, — raspaviadaje niaviesta Pałojki. — Darosłyja i dzieci pastajanna fatahrafujucca ź imi. Moža, jon dzieści vypadkova ŭ kadr trapiŭ?
Pa słovach Vity, Źmicier pražyŭ u jaje va Ukrainie try miesiacy, paśla viarnuŭsia ŭ Biełaruś. I tolki niadaŭna znoŭ pryjazdžaŭ na adnu tydzień u Kurachava. Heta možna pravieryć i pa štampach u pašparcie.
— Jon 20 śniežnia pavinien vyjści, i chaj adrazu jedzie dadomu va Ukrainu, — ledź nie płača Vita. — Nie treba mnie ni jaho kvatera, ni tyja hrošy. My chočam narmalnuju siamju stvaryć, pracavać, žyć duša ŭ dušu. Jon dobry zvarščyk, u nas u horadzie jość dzie pracavać — jość HRES, zavod «Elektrastal»… Ja nie razumieju, jak takoje ŭ vašaj krainie mahło adbycca? Dla mianie heta šok. Ja jaho bolš nikudy nie adpušču.
