Hetaj tabličkaj, pastaŭlenaj kramloŭskaj kancylaryjaj dla ŭkazańnia miesca biełaruskaj delehacyi na samicie ADKB u Maskvie, Kreml zusim jasna abaznačyŭ svaje dalejšyja płany adnosna Biełarusi. I sprava tut zusim nie ŭ praviłach hramatyki ruskaj movy…
U źviazku z hetym pryhadałasia adna historyja. U 1999 hodzie ŭ Smalensku, dzie 1 studzienia 1919 hoda i była abvieščanaja «Sovietskaja Biełoruśsija», śviatkavałasia 80-hodździe BSSR. Tudy palacieŭ uvieś naš palityčny synklit.
Rasiejskuju delehacyju ačolvaŭ staršynia Dumy Sielaźnioŭ. U zali prosta zaškalvaŭ pansłavizm (ciapierašni «russkij mir»). Łozunhi, pramovy — Łukašenka taksama, što nazyvajecca, u temie, ale ŭsich pierahavaryŭ (tut navat bolš dakładnym budzie ruskaje słova «pieriešib») mitrapalit Smalenski j Kalininhradcki (ciapierašni patryjarch Maskoŭski i ŭsioj Rusi) Kirył. Vystupiŭ i skazaŭ, što nie bačyć nijakich pieraškodaŭ dla našaj usieahulnaj jednaści, bo niama nasamreč nijakich biełaruskich i ŭkrainskich movaŭ, biełaruskaha i ŭkrainskaha narodaŭ, a jość adno vialikaje ruckaje dreva, na jakim biełaruskaja i ŭkrainskaja haliny kali sami nie abłamajucca, dyk absiakucca… I kiraŭnik Biełarusi padniaŭsia i zaplaskaŭ. Jamu, pa sutnaści, kažuć, što Biełarusi niama (dyk choć zadajsia pytańniem: skul ty tady ŭziaŭsia, jaki ty biełaruski prezident?), a jon ustaje i ŭ dałoni plaskaje…
Voś i na ciapierašniaj sustrečy ŭ Kramli možna skazać paplaskaŭ.
Doma zajaŭlaŭ: «Durnaja i biazmozhłaja palityka», — a ŭ Maskvie: «Pucin nie ŭ čym nie vinavaty».
Nu, nie Pucin ža tabličku staviŭ. I naprykancy — pra haliny, jakija kali nie abłamajucca, dyk absiakucca. Va Ukrainie pasprabavali absiekčy. Abłamalisia.
