U vyniku avijakatastrofy 17 lipienia zahinuli 283 pasažyry i 15 členaŭ ekipažu
Słužba biaśpieki Ukrainy abvierhła infarmacyju Śledčaha kamiteta Rasii ab dačynieńni ŭkrainskaha samalota da krušeńnia małajzijskaha «Boinha» ŭ Danieckaj vobłaści.
U pres-słužbie SBU zajavy rasijskich śledčych nazvali «čarhovym fejkam» i zajavili, što ździŭlenyja takoj apieratyŭnaściu rasijskaha viedamstva.
Raniej u SKR zajavili, što znajšli i dapytali tak zvanaha «sakretnaha śviedku», jaki ŭ intervju haziecie «Komsomolskaja pravda» paviedamiŭ ab palotach šturmavikoŭ Su-25, jakija bazavalisia ŭ rajonie Dnieprapiatroŭska, u dzień katastrofy.
Mužčyna, imia jakoha nie raskryvajecca, śćviardžaŭ, što «Boinh» byŭ nibyta źbity ukrainskim vajskovym samalotam, jakim kiravaŭ lotčyk Uładzisłaŭ Vałošyn.
SBU pryznała, što ŭkrainski lotčyk Vałošyn isnuje, ale ŭ dzień krušeńnia małajzijskaha avijałajniera nijakich vyletaŭ jon nie ździajśniaŭ.
«Jak było ŭstanoŭlena, 17 lipienia 2014 avijacyja pavietranych sił Uzbrojenych sił Ukrainy ŭ adpaviednaści z płanam praviadzieńnia antyterarystyčnaj apieracyi nie ŭžyvałasia», — zajaviŭ daradca kiraŭnika SBU Markijan Łubkiŭski.
«Zhadany vajskoviec, kapitan Vałošyn u hety dzień palotaŭ nie ažyćciaŭlaŭ, a jaho samalot znachodziŭsia ŭ ramoncie z-za paškodžańnia padčas avaryjnaj pasadki 16 lipienia 2014», — dadaŭ pradstaŭnik SBU.
