Pytańnie, ci treba chadzić da stamatołaha rehularna, kali ničoha nie balić, dla mnohich biełarusaŭ daŭno nie pytańnie. Ale ž ci jość realnyja padstavy naziracca ŭ dantysta 2 razy na hod, ci heta kamiercyjny chod, prydumany dantystami, kab zaciahnuć nas lišni raz na pryjom?
I sapraŭdy, kali vy nie majecie ŭ rocie istotnych prablem, nie važna, pryjdziecie vy 2 razy na hod ci raz na 2 hady. Ale značeńnie rehularnaści naviedvańniaŭ tym bolšaje, čym bolš prablem źjaŭlajecca ŭ pacyjenta.
Zakłapaciŭšysia pytańniem, ci palapšajuć stamatałahičnaje zdaroŭje rehularnyja ahlady, amierykancy zrabili nastupnyja vysnovy. U płanie paškodžańnia zuboŭ karyjesam istotnaj roźnicy nie nazirałasia – u siarednim kolkaść paškodžanych zuboŭ była adnolkavaja i ŭ tych, chto naviedvaŭ dantysta rehularna, i ŭ tych, chto rabiŭ heta niačasta. Anałahičnyja vyniki byli atrymanyja pry analizie zapaleńnia dziosnaŭ.
Adnak – i momant hety sapraŭdy surjozny – rehularnyja ahlady paražniny rotu – heta častka ankałahičnaha ahladu, a puchliny, znojdzienyja ŭ rocie, štohod pryvodziać da kalectva i śmierci tysiačy, a to i dziasiatki tysiač čałaviek. Tut užo, sapraŭdy, čym raniej znojdziena – tym bolš šancaŭ na vyžyvańnie.
Ale heta – statystyka, i pakazčyk «adna kuryca na adnaho žychara» nie śviedčyć pra najaŭnaść kurycy ŭ vašaj kankretnaj ladoŭni. Tamu, kali vaš dantyst kaža pra vysokuju ryzyku karyjesu albo chvarob pieryjadonta mienavita ŭ vas, dyk vam nieabchodna byvać u dantysta dvojčy na hod. Kali vašaja paražnina rota paraŭnalna ŭstojlivaja i vy nie majecie dadatkovych faktaraŭ ryzyki – možacie skaracić vizity ŭdvaja i navat utraja.
Chto ž źjaŭlajecca hrupaj ryzyki ŭ płanie stamatałahičnaha zdaroŭja?
Pryhadajcie svaich baćkoŭ, pacikaŭciesia stanam rota ŭ bratoŭ dy siaścior. Zaŭčasnaja strata albo niezadavalniajučy stan ich zuboŭ dy dziosnaŭ – zvanočak dla vas. Chvoryja na dyjabiet, epilepsiju, ščytavicu, ankałohiju luboj łakalizacyi, chvaroby kryvi niepaźbiežna sutyknucca z paharšeńniem stanu zuboŭ. Ciažarnaść, inšyja harmanalnyja źmieny, lubyja apieracyi pad narkozam (jakija vy pieranieśli ci nieŭzabavie musicie pieranieści) – nahoda być pilnym u zubnych spravach. Prafiesijnyja škodnaści – pastajanny kantakt z kisłotnymi vypareńniami i ciažkimi mietałami, praca ŭ kandytarskim cechu i inš., pryjem niekatorych lekaŭ – naaprykład, salanaj kisłaty… Śpis amal biaskoncy. Pieryjady kiepskaha charčavańnia, pastajannaha stresu i niedastupnaści efiektyŭnych srodkaŭ hihijeny – da prykładu, znachodžańnie ŭ miescach pazbaŭleńnia voli – hetak sama aŭtamatyčna pieravodziać pacyjenta ŭ hrupu ryzykantaŭ. Ludzi z «kamiennymi» chvarobami nyrak, piačonki, žoŭniavaha puchira ci ślinnych załoz čaściakom majuć proćmu kamianioŭ i na zubach.
Štodzionnyja chatnija hihijeničnyja pracedury, biezumoŭna, važny faktar. Niemahčymaść paŭnavartasna ačyścić rot (šyny pry pierałomach skivic, parušeńnie kaardynacyi jak śledstva pieraniesienych chvarob ci traŭmy mozha, dyj prosta pierałom viadučaj ruki) ŭ karotki termin pryvodzić da paharšeńnia stanu rota. Heta toj vypadak, kali adnaznačna nieabchodnaja rehularnaja prafiesijnaja hihijena na pryjomie ŭ stamatołaha. A jak časta treba zdymać zubny kamień, zubny nalot dy paliravać zuby, padkaža lekar.
Źjaŭleńnie na tvary albo ŭ rocie niezrazumiełych plamak, ranak, erozij, blašak, defiektaŭ, barodavak i h.d., jakija na praciahu tydnia-dvuch nie źnikli biasśledna – nahoda źviarnucca da śpiecyjalista, bo takim čynam mohuć prajaŭlacca roznyja chvaroby ad raku da sifilisu i nie tolki.
Padsumujem: vizit da dantysta – heta nie srodak prafiłaktyki karyjesa ci hinhivita jak takoha, ale sposab paźbiehnuć uskładnieńniaŭ – razbureńnia ci razhojdvańnia zuboŭ – svaječasovym lačeńniem. Čym bolš faktaraŭ ryzyki na vas upłyvajuć, tym čaściej musiać być vašyja vizity da stamatołaha. Abaviazkova sanirujcie rot napiaredadni apieracyj na lubym orhanie i pry płanavańni ciažarnaści. I pamiatajcie: usie hetyja rekamiendacyi datyčać situacyi, kali vas u vašym rocie ničoha nie turbuje dy nie biantežyć. Kali ž prablema prajaviłasia, źviartacca pa dapamohu treba jak maha chutčej.
