Siońnia ŭ Minsku adbudziecca finał nacyjanalnaha adboračnaha tura mižnarodnaha konkursu pieśni «Jeŭrabačańnie-2015».
Za prava pradstaŭlać Biełaruś na piesiennym forumie buduć zmahacca hurt Napoli, Lis, Darija, Gunesh, hurt Muzzart, Valeryja Sadoŭskaja, hurt Rostany, Žaniet, Alaksiej Hros, hurt «MIŁKI», Uzari & Maimuna, hurt «Bieatrys», Vital Varanko, Anastasija Małaškievič, Tasha ODI.
«Miłki»
Sioleta adbor pieramožcy budzie prachodzić pa novych praviłach. Kali raniej jon vyznačaŭsia na 50% hałasavańniem telehledačoŭ i jašče na 50% — acenkami žury, to sioleta ahulny vynik hałasavańnia za kožnaha ŭdzielnika składajecca z vaśmi acenak, ź ich siem acenak — heta vyniki hałasavańnia kožnaha ź siami členaŭ žury i adna acenka — vynik hałasavańnia hledačoŭ.
Jak paviedamili ŭ pres-słužbie Biełteleradyjokampanii, pry ŭniasieńni źmienaŭ u praviły praviadzieńnia konkursu arhanizatary ŭziali za asnovu maltyjskuju sistemu hałasavańnia, dzie rejtynh prahladu nacyjanalnaha adboru składaje 95%.
Adkazvajučy na pytańnie, ci nie vykliča novaja sistema rostu niezadavolenaści z boku telehledačoŭ, kiraŭnik pres-słužby Śviatłana Smałonskaja-Kraskoŭskaja skazała: «Biełteleradyjokampanija ŭžo dvanaccaty hod pravodzić nacyjanalny adbor dla konkursu «Jeŭrabačańnie» i rychtuje ŭdzielnika dla hetaha konkursu, i ŭ lubym vypadku, pakolki nacyjanalny adbor kampanija pravodzić u vyhladzie televizijnaha šou, u jakim biaruć udzieł i telehledačy, i prafiesijnaje žury, my pavinny razumieć, što pieramožca zaŭsiody adzin. Tamu zaŭsiody budzie niejkaja niezadavolenaść, nieparazumieńnie. Da hetaha treba być hatovym».
Pavodle słoŭ Smałonskaj-Kraskoŭskaj, sioleta źmianiŭsia taksama padychod da vybaru prafiesijnaha žury, i na konkursie pracujuć dźvie sudziejskija kalehii: pieršaja — na etapie prasłuchoŭvańnia, druhaja — u finale. «U finale členy žury buduć znachodzicca ŭ roznych pakojach, jany nie buduć adzin pra adnaho viedać i nie buduć mieć dostup da infarmacyi ab hałasavańni adzin adnaho i telehledačoŭ. Imiony členaŭ žury da zakančeńnia finału taksama nie abviaščajucca», — skazała pradstaŭnik teleradyjokampanii.
Finał adboračnaha tura adbudziecca ŭ farmacie televizijnaha kancerta. Šou pačniecca ŭ 22.00 i budzie tranślavacca na telekanałach «Biełaruś 1» i «Biełaruś 24», a taksama na sajcie www.eurovision.tv.
Mižnarodny konkurs pieśni «Jeŭrabačańnie-2015» adbudziecca ŭ mai nastupnaha hoda ŭ Aŭstryi.
U apošnija hady nacyjanalny adbor na konkurs «Jeŭrabačańnie» supravadžaŭsia skandałami. Tak, u 2014 hodzie ŭ finale adrazu dva ŭdzielniki konkursu nabrali adnolkavyja bały. Śpiavak Tea atrymaŭ 8 bałaŭ u vyniku hladackaha hałasavańnia i 12 bałaŭ — ad členaŭ žury. Duet Maks Łorens & Dzidziula, naadvarot, atrymali 12 bałaŭ ad hledačoŭ i 8 — ad žury. Pa praviłach konkursu, kali dva kankursanty nabrali adnolkavuju kolkaść bałaŭ, pieramožca vyznačajecca paŭtornym hałasavańniem žury, jakoje adnahałosna prahałasavała za Tea. Paźniej na internet-placoŭcy change.org pačaŭsia zbor podpisaŭ za admienu vynikaŭ finału. U zvarocie havaryłasia, hałasavańnie žury «źjaŭlajecca subjektyŭnym mierkavańniem žury i nijak nie adlustroŭvaje mierkavańnie ŭsiaho naroda Respubliki Biełaruś».
U 2012 hodzie vyniki nacyjanalnaha adboračnaha tura «Jeŭrabačańnia» Biełarusi pierahladalisia śpiecyjalnaj kamisijaj, jakaja była stvorana pa asabistym rasparadžeńni Alaksandra Łukašenki z-za nieadnaznačnaj reakcyi hramadskaści na vyniki konkursu. Kamisija dakazała, što vyniki finału byli padtasavanyja. U vyniku na «Jeŭrabačańnie-2012» ad Biełarusi zamiest abjaŭlenaj pieršapačatkova Aleny Łanskoj adpraviŭsia hurt Litesound. Alena Łanskaja pradstaŭlała Biełaruś na mižnarodnym konkursie ŭ 2013 hodzie.
