Kandydaturu Andreja Kabiakova na pasadu premjer-ministra prapanavaŭ jaho papiarednik Michaił Miaśnikovič «i nie tolki jon».
Ab hetym paviedamiŭ Alaksandr Łukašenka, pradstaŭlajučy 29 śniežnia Kabiakova na pasadzie premjer-ministra.
Jon jašče raz padkreśliŭ, što «nijakaj nadzvyčajščyny» ŭ kadravych rašeńniach, pryniatych im 27 śniežnia, niama, heta nie było spantannym zachadam. «Ja pierabaleŭ minimum paŭhoda hetymi pytańniami. Vielmi šmat było sumnieńniaŭ. Nichto nie łabiravaŭ nijakija pasady. Da apošniaha momantu naohuł mnohija nie viedali, čym jany buduć zajmacca. Heta było asabista majo rašeńnie. Ale heta rašeńnie nie ź nieba ŭziataje».
Pavodle słoŭ Łukašenki, zadaŭha da kančatkovaha rašeńnia jon źviarnuŭsia z prośbaj da premjer-ministra i inšych słužbovych asob (usiaho kala 10—13 čałaviek) pradstavić svajo bačańnie pa składzie ŭrada.
«Vielmi sakretna (navat nie poštaj, a kanviertam na majo imia), Michaił Uładzimiravič Miaśnikovič i mnohija inšyja pakłali mnie na stoł svajo bačańnie ŭrada: chto ŭ im pavinien być.
Asabista biez usiakich pamočnikaŭ, supastaŭlajučy ŭsie punkty hledžańnia, vyznačajučy svajo staŭleńnie da toj ci inšaj słužbovaj asoby ŭ zaležnaści ad taho, jakija pierad im stajali zadačy i buduć stajać potym, ja prymaŭ rašeńni», — raskazaŭ kiraŭnik dziaržavy.
Pavodle jaho słoŭ, na praciahu dvuch miesiacaŭ parłamientu budzie pradstaŭlena prahrama dziejnaści ŭrada.
Pry hetym, dadaŭ Łukašenka, z Kabiakova nie zdymajecca zadača padrychtoŭki prapanoŭ pa dalejšaj aptymizacyi orhanaŭ dziaržkiravańnia, čym jon zajmaŭsia, pracujučy na pasadzie kiraŭnika Administracyi prezidenta.
«Nam nieabchodna rašuča pazbavić dziaržorhany ad dublujučych i nieŭłaścivych im funkcyj. Vykarystoŭvajcie mižnarodny vopyt i zychodźcie, samaje hałoŭnaje, z našaj situacyi, našaha žyćcia. Nichto nie moža pastavić pytańnie pavyšeńnia zarpłaty dziaržsłužačym biez aptymizacyi padparadkavanych vam struktur. Aptymizujciesia, prybirajcie lišnija funkcyi, jakija nie patrebnyja na tym ci inšym etapie, i dziejničajcie. Prybirajučy funkcyi, my pavysim dyscyplinu i adkaznaść za pryniatyja rašeńni», — ličyć Alaksandr Łukašenka.
