Aficyjna pra heta nie abviaščałasia, ale realnyja kroki zroblenyja. Tak, zapraŭka pa adrasie Brykieta, 23, što na vyjeździe na Hrodna, sapraŭdy biełarusizavałasia. Apieratar Alaksandr Pucha pryjazna ŭśmichajecca i havoryć pa-biełarusku z usimi, navat z tymi, chto da jaho źviartajecca pa-rusku.
Na pytańnie, jakim čynam rychtavali supracoŭnikaŭ, Alaksandr uzhadvaje kursy «Mova nanova» i kaža, što pravodzilisia admysłovyja treninhi.
U toj ža čas na mini-zapraŭcy na Niakrasava, 41 havorać pa-rusku. Na Kazinca, 133 taksama.
A voś na zapraŭcy pa adrasie Pryharadnaja, 69 na słova «Dziakuj» čujem niaśmiełaje «Dziakuj i vam. Prychodźcie da nas jašče».
Akramia hetaha, z 1 studzienia staronka hrupy kampanijaŭ A-100 u fejsbuku taksama pierajšła na biełaruskuju movu.
