Alaksandr Łukašenka razam z małodšym synam Mikałajem 7 studzienia, u śviata Rastva, naviedaŭ minski Śviata-Duchaŭ kafiedralny sabor.
Jak paviedamlaje pres-słužba prezidenta, «kiraŭnik dziaržavy pavinšavaŭ usich z hetym śvietłym śviatam i pažadaŭ dabra, miru ŭ siemjach, u krainie, a hałoŭnaje — u dušach».
Łukašenka vykazaŭ padziaku carkvie «za toj vialiki ŭniosak, jaki jana ŭnosić u spravu ŭmacavańnia miru i spakoju na biełaruskaj ziamli». «Vy možacie abapiracca na dziaržavu, uładu. Vy zaŭsiody možacie być upeŭnienyja, što ŭ našaj krainie budzie mirna i spakojna. Heta my harantujem», — zajaviŭ jon.
«Dumaju, što hety niaprosty hod my projdziem paśpiachova i załoham tamu — dabrynia i žadańnie našych ludziej žyć u miry na ziamli, padoranaj nam Boham», — skazaŭ Łukašenka.
«Vinšuju ŭsich našych biełarusaŭ, usich našych siabroŭ, bratoŭ, susiedziaŭ. Žadaju im taksama miru i dabra i samaje hałoŭnaje — miru našaj rodnaj paŭdniovaj susiedcy. Ja dumaju, my ŭsio zrobim dla taho, kab byli mir i spakoj u dušach i sercach hetych takich blizkich nam ludziej», — skazaŭ biełaruski kiraŭnik.
Razam z synam Łukašenka zapaliŭ śviečku kala abraza Minskaj Božaj Maci.
Mitrapalit Minski i Zasłaŭski Pavieł, patryjaršy ekzarch usiaje Biełarusi ŭručyŭ Alaksandru Łukašenku abraz Božaj Maci «Trajaručyca», pryviezienuju z hary Afon u Hrecyi.
U svaju čarhu Łukašenka pieradaŭ u dar Biełaruskaj pravasłaŭnaj carkvie suvienirnaje pano, na jakim namalavany Kryžaŭźvižanski sabor u Połacku. Pano vyrablena ź sierabra ŭ technicy čakanki. Kryžaŭźvižanski sabor, pabudavany ŭ 1893 hodzie, uvachodzić u kompleks Spasa-Jefrasińnieŭskaha manastyra ŭ Połacku. U hetym sabory zachoŭvajucca moščy śviatoj prapadobnaj Jeŭfrasińni Połackaj.
