Ilustracyjnaje fota, ridus.ru
Kamitet dziaržaŭnaj biaśpieki Biełarusi paviedamiŭ pra zatrymanych u Minskim rajonie musulman-sałafitaŭ. Vypadak mieŭ miesca ŭ kancy listapada 2014-ha hoda, ale paviedamili pra heta tolki zaraz, paśla teraktu ŭ Paryžy.
Pres-sakratar KDB Artur Strech paviedamiŭ Jeŭraradyjo, što «hetaja hrupa sfarmavałasia pad upłyvam relihijna-ekstrymisckaj arhanizacyi «Chizb ut-Tachryr». U joj było 5 zamiežnych hramadzian i 15 hramadzian Biełarusi. Apošnija pavinny byli pravodzić misijanierskuju niezakonnuju dziejnaść siarod musulman na terytoryi Minskaj, Hrodzienskaj, Mahiloŭskaj abłaściej (jak viadoma, u našaj krainie žyvie bolš za 30 tysiač musulman).
«Čakać, pakul jany ździejśniać kankretnyja pravaparušeńni ci złačynstvy, zrazumieła, nichto nie staŭ. Pakul jany nie ździejśnili ničoha supraćpraŭnaha, byli ŭžyty dastatkova łajalnyja miery prafiłaktyčnaha charaktaru», — raspavioŭ Jeŭraradyjo Artur Strech..
Zatrymanyja zamiežniki byli departavany z našaj krainy. Što da hramadzian Biełarusi, dyk ich papiaredzili, kaža pres-sakratar KDB.
Partyja «Chizb ut-Tychryr» naličvaje kala miljona aktyŭnych udzielnikaŭ. Na rasijskim sajcie arhanizacyi paviedamlajecca, što jana «admaŭlaje hvałtoŭnyja dziejańni ŭ metach pabudovy isłamskaj dziaržavy». Pašyrajucca jany mietadam «sieciavoha markietynhu», jak i «Al-Kaida». Sałafity vystupajuć za fundamientalizm u isłamie. Pavodle ich ideałohii, musulmanin musić žyć hetak ža stroha, jak pieršyja musulmanie. Sałafitami admaŭlajucca pałomnictvy da mahił śviatych.
Arhanizacyju ličać zabaronienaj u šerahu krain śvietu.
Naprykład, u Rasii i Tadžykistanie. U Niamieččynie publičnaja dziejnaść «Chizb ut-Tachryr» zabaroniena za antysiemityzm. U susiedniaj Ukrainie partyja dziejničaje lehalna, pravodzić svaje źjezdy. Cikava, što pradstaŭniki partyi nazyvajuć Złučanyja Štaty «hałoŭnym satanoj», ale ŭ Paŭnočnaj Amierycy forumy «Chizb ut-Tachryr» pravodziacca lehalna.
