«Biełaruś moža restrukturavać svoj doŭh», — paviedamiŭ Alaksandr Łukašenka ŭ čas štohadovaj pres-kanfierencyi ŭ čaćvier. Imavierna, jon prosta nie ŭśviedamlaŭ roźnicy miž słovami «restrukturavać» i «refinansavać». Spałochanyja inviestary kinulisia zbyvać biełaruskija bondy. Ciaham hadziny cana biełaruskich ablihacyj upała na 20—30%, paviedamlaje Financial Times.
Cana ablihacyj na $1 młrd z pahašeńniem u biahučym hodzie abvaliłasia, a dachodnaść ŭźlacieła da 46,8% z 14% napiaredadni. Dachodnaść ablihacyj na $800 młn z pahašeńniem u 2018 hodzie vyrasła da 19,5% z 12,4%.
Ustryvožanyja finansisty skantaktavalisia z daradcami Łukašenki, jakija pieradali jamu zapisku z prośbaj terminova vypravicca. Łukašenka śpiecyjalna viarnuŭsia da temy i ŭdakładniŭ, što mieŭ na ŭvazie prostaje refinansavańnie doŭhu. Biełaruś raźličvaje na rasijski kredyt na hetyja mety.
Rynki skarektavalisia, ale dachodnaść usio adno zastałasia na śmiećcievych uzroŭniach. Pa stanie na 14.00 piatnicy dachodnaść bondaŭ 2015 hoda składała 24,46%, 2018 hoda — 16,88%. Heta bolš, čym u pieraddefołtnaj Hrecyi.
