Śpikier dziaržaŭnaj Dumy Rasii Siarhiej Naryškin nakiravaŭ Jeŭrapiejskamu parłamientu i Radzie Jeŭropy dziŭny list, u jakim jon nazyvaje vajnu va Ukrainie «baraćboj suprać nacyzmu» i abiacaje «mabilizavać usie siły Rasii dla abarony stabilnaści va ŭsioj Jeŭropie».
deita.ru
Pra heta havorycca ŭ artykule, apublikavanym na sajcie Newsweek. U Šviecyi hetyja pahrozy Maskvy vyklikali abureńnie.
U liście Naryškin «papiaredžvaje», što isnuje pahroza «novaha padziełu Jeŭropy», jakaja pastupaje ad sankcyj Zachadu suprać Rasii, vajny va Ukrainie i terarystyčnych napadaŭ u Paryžy, jakija adbylisia ŭ studzieni. Pavodle infarmacyi vydańnia, rasijski śpikier ličyć, što mirnaje žyćcio 800 miljonaŭ jeŭrapiejcaŭ pad pahrozaj.
Naryškin zaklikaje Jeŭrapiejskich parłamientaryjaŭ spynić kryzis i abvastreńnie ŭ duchu chałodnaj vajny.
«My nie pavinny dazvolić, kab naščadki nacyzmu, hetaj złačynnaj ideałohii, vyklikali novy padzieł u jeŭrapiejskaj siamji nacyj. Taki padzieł užo adnojčy pryvioŭ da śmierci i niaščaściaŭ, pakut i złamanych losaŭ, hoładu i spustašeńnia ŭ našaj historyi», — cytuje vydańnie list Naryškina.
Rasijski palityk zaklikaje jeŭrapiejcaŭ «uśviadomić», pierad jakoj niebiaśpiekaj akazałasia Jeŭropa, i prykłaści namahańni, kab zachavać mir na kantyniencie». List adrasavany ABSIE, Jeŭrapiejskamu parłamientu, nacyjanalnym parłamientam krain Jeŭropy i Parłamienckaj asamblei Rady Jeŭropy.
Jaho tekst źjaviŭsia ŭ šviedskaj presie i vyklikaŭ abureńnie ŭ palitykaŭ u Stakholmie. Niekatoryja ź ich navat ličać, što Naryškin, vykarystoŭvajučy dypłamatyčnuju movu, pahražaje Jeŭropie vajnoj, kali Rasii dalej buduć pieraškadžać vieści vajnu va Ukrainie. U hety ž čas, vydańnie piša, što ŭ Jeŭraparłamiencie prakamientavali, što ničoha nie viedajuć pra list ad Naryškina z pahrozami. Raniej inšy rasijski parłamientaryj Alaksiej Puškoŭ pryhraziŭ Jeŭropie vajnoj, kali ZŠA ŭzbrojać Ukrainu.
