25 sakavika adbudziecca «Dzień Voli» — śviata nie kankretnaj palityčnaj partyi ci hramadskaha abjadnańnia, heta śviata Majo i Tvajo, a značyć — kožnaha, chto bačyć Biełaruś mocnaj, niezaležnaj i paśpiachovaj.
Tradycyjny farmat akcyi — šeście ŭ Minsku ad Akademii navuk da płoščy Banhałor. Ale naśpieŭ čas źmianić hetuju formu — zrabić «Dzień Voli» masavym dy jaskravym śviatam, u jakim chočacca ŭdzielničać kožnamu.
Tamu ŭ hetym hodzie ŭsio budzie inakš!
«Moj Dzień Voli» — heta supolnaje śviata, jakoje ŭsim nam zapomnicca nadoŭha. Jakim čynam? Voś 10 krokaŭ, jak my heta zrobim razam:
1. Raspaŭsiudžvajem hety tekst razam z padrychtavanymi banierami, pościm va ŭsie sacyjalnyja sietki i na sajty, dzie tolki mahčyma. Paznačajem chešteh #25sakavika.
2. 25 sakavika ŭ 17.00 prychodzim da stancyi mietro Akademija navuk. Nie chvalujciesia! Usio zakonna i biaśpiečna. Minharvykankam zvyčajna dazvalaje šeście na Dzień Voli.
My nie idziem na biessensoŭny mitynh pad nahladam milicyi na płoščy Banhałor. My vychodzim, kab pakazać moc i pryhažość biełarusaŭ u vialikaj supolnaści adnadumcaŭ.
3. Pačynajem rychtavacca da akcyi ŭžo siońnia. Stvoranyja padziei ŭ Fejsbuku i «Vkontaktie», sačycie za abnaŭleńniami i raspaŭsiudžvajcie infarmacyju. Dasyłajcie prapanovy na [email protected], pišycie pad chešteham #25sakavika.
4. Biarem nacyjanalnyja ściahi. Davajcie bieź ściahoŭ palityčnych partyj, hramadskich arhanizacyj i ruchaŭ. Dastavajcie z šafaŭ, zdymajcie sa ścienaŭ svaje bieł-čyrvona-biełyja ściahi. Kali niama — možna pašyć ci kupić, heta nie składana. Možna namalavać na papiery ci ščace try pałoski: biełuju, čyrvonuju i biełuju. Heta kolery, jakija nas jadnajuć.
Pad hetym ściaham my zdabyli niezaležnaść, pad im prymaŭ prysiahu navat Łukašenka. Nie bojciesia — bieł-čyrvona-bieły ściah u Biełarusi nikim i nikoli nie byŭ zabaronieny. A na Dzień Voli ani milicyja, ani chtości inšy nie paśmieje jaho ŭ vas adabrać.
5. Malujem abo drukujem ŭłasnyja płakaty z zaklikami, łozunhami dy idejami, jakija chočam vykazać hramadstvu i śvietu. Dziakujučy žurnalistam, fotazdymki z vašymi płakatami pabačać sotni tysiačaŭ. Budźcie kreatyŭnymi! Dobry płakat u rukach pryhožaha čałavieka moža skazać bolš, čym pałymianaja pramova z trybuny.
Publikujcie pad chešteham #25sakavika fotki, jak vy malujecie płakaty, pakažycie prykład, kab inšyja padchapili.
6. Kuplajcie ŭ CUMach, HUMach i hałanterejnych adździełach stužki ź biełaruskim arnamientam. Narazajcie na kavałački pa 30-40 sm, prynoście z saboju na Dzień Voli. Budźcie ŭ trendzie!
Akcyi #biełaruskajastužka i «Paznač siabie biełarusam» pakazali, što stužka z arnamientam na vašym adzieńni stała prajavaj hramadzianskaj pazicyi. Razdavajcie stužki minakam, paviazvajcie na anteny mašynaŭ, zaplatajcie ŭ vałasy, z uśmieškaj darycie milicyjantam.
7. Nadziajem vyšyvanki, vyšymajki, narodnyja stroi ci luboje adzieńnie z arnamientam. Vyciahvajcie pryhožyja vyšyvanyja kašuli i spadnicy z babulčynych kufraŭ, nabyvajcie ŭ majstroŭ ci kramach. My majem tradycyi dy lubim svajo. Nacyjanalnaje adzieńnie vyłučaje i robić nas admietnymi.
8. Śpiavajem biełaruskija pieśni. Uzhadajcie teksty «Hraj», «Nie być skotam», «Try čarapachi», «Prostyja słovy»… Dasyłajcie svaje prapanovy na mejł [email protected]. Davajcie vyznačym dziasiatak piesień, jakija vykanajem razam padčas šeścia.
Bubnačy, biarycie svaje tamtamy i barabany, kab stvarać rytm i padvyšać ahulnyja decybieły śviata.
9. Vinšujem, uśmichajemsia i razmaŭlajem pa-biełarusku. Bo jakoje nacyjanalnaje śviata biez nacyjanalnaj movy?
10. Zapuskajem fłešmob u internecie. Mianiajem svaje avatarki ŭ Fejsbuku, Tvitery, Fejsbuku i «Vkontaktie», na biełuju ikonku z čyrvonym nadpisam — vašym imiem albo chešteham #25sakavika. Usie avatarki buduć vyhladać padobna, jak bieł-čyrvona-bieły ściah, i buduć unikalnymi adnačasova.
I apošniaje, jak zaŭždy, hałoŭnaje (dla čynoŭnikaŭ, milicyjantaŭ, KDB i inšych): 25 sakavika my idziem na Dzień Voli nie mianiać uładu dy ładzić biesparadki.
My idziem, kab pakazać svaju luboŭ da krainy, movy i kultury. My idziem prademanstravać našaje imknieńnie da niezaležnaści Biełarusi. My idziem pakazać sabie i śvietu — što my narod, jaki choča žyć volna i hodna na svajoj ziamli.
Rychtujemsia i raspaŭsiudžvajem infarmacyju.
Pabačymsia 25 sakavika na Našym Dni Voli!
Žyvie Biełaruś!
