Rasijskaj kampanija «Atastrojekspart» adčuvaje finansavyja ciažkaści pry budaŭnictvie Biełaruskaj AES, ale raboty pa stvareńni stancyi praciahvajucca pa hrafiku. Pra heta zajaviŭ namieśnik hienieralnaha dyrektara RUP «Biełaruskaja AES» Andrej Barkun 11 sakavika na pres-kanfierencyi ŭ pres-centry BiełTA.
«My budujem našu stancyju nie ŭ niejkim ekanamičnym zapaviedniku, nie ŭ niejkaj admysłovaj ekanamičnaj zonie, — adznačyŭ jon. — Tamu, naturalna, usie prablemy, jakija ŭźnikli ŭ Rasii (tym bolš hienpadradčyk u nas rasijski), u toj ci inšaj miery na chodzie budaŭnictva adbivajucca».
Tym nie mienš, padkreśliŭ Barkun, na siońnia rabota pa budaŭnictvie AES «nie spyniłasia» i z hrafika z-za najaŭnaj situacyi nie vybjecca, a finansavańnie budaŭnictva zastaniecca «rytmičnym».
«Prablemy ŭ pieršuju čarhu tyčacca padradčyka («Atamstrojeksparta». — BiełaPAN.), u jaho ŭźnikli prablemy, — skazaŭ namieśnik hiendyrektara budaŭnictva BiełAES. — U suviazi z toj situacyjaj, što skłałasia ŭ Rasii, jaho ekanamičnyja pakazčyki pa prybytku, rentabielnaści, tak by mović, nakazali doŭha žyć. Kab nie vyjści na straty, jany źviarnulisia, maŭlaŭ, dapamažycie nam utrymacca na płyvu. My razumiejem, što heta padradčyk manapolny, adziny, tamu, kali stracim jaho, nikomu dobra nie stanie. Treba razumieć, što kali my razam vyrašyli pabudavać stancyju, to treba jaje pabudavać».
Barkun patłumačyŭ, što ŭ kantrakcie cana na budaŭnictva BiełAES vyznačana ŭ dołarach ZŠA, u hetaj ža valucie vydzieleny rasijski kredyt na zbudavańnie atamnaha abjekta. Adnak košt vykananych budaŭniča-mantažnych rabot i abstalavańnia, jakoje pastaŭlajecca, vyznačajecca ŭ rasijskich rublach z nastupnym pieraraźlikam u dołary pa kursie na kaniec raźlikovaha miesiaca. Słovam, kali padradčyk vykanaŭ raboty na 30 młn. rasijskich rubloŭ, to raniej za svaju rabotu jon atrymaŭ by kala 1 młn. dołaraŭ, a ciapier z-za padzieńnia koštu rasijskaha rubla suma vypłat u dołarach źnizicca ŭdvaja.
Pastaŭščyki, jakija raniej vyjhrali tendar na pastaŭku abstalavańnia pa vyznačanaj canie, siońnia zajaŭlajuć pra niemahčymaść pastavić jaho za hetuju canu, paviedamiŭ Barkun.
«Možna, viadoma, zadziejničać ryčahi, štrafy, napeŭna, heta było b pravilna. Ale za hetym adbudziecca paŭtornaje praviadzieńnie vybaru padradčyka, vyznačeńnie cany, jakaja nie budzie mienšaj za tuju, pa jakoj zaklučany dahavor, adsunucca terminy. Tamu treba šukać uzajemaprymalnaje rašeńnie, bo vyhada ŭ biełaruskaha boku — atrymać svoječasova biaśpiečnuju, nadziejnuju, pracazdolnuju stancyju i nie prajhrać pa košcie hetaj stancyi», — dadaŭ namieśnik hiendyrektara BiełAES.
