Centr padtrymki ludziej z narkatyčnaj zaležnaściu adkryty ŭ Minsku pry padtrymcy Biełaruskaha hramadskaha abjadnańnia «Pazityŭny ruch».
Jak paviedamiŭ 11 sakavika na adkryćci centra jaho kaardynatar Viačasłaŭ Samaryn, centr stvorany z metaj abmiežavańnia raspaŭsiudžvańnia VIČ-infiekcyi siarod ludziej, jakija ŭžyvajuć narkotyki, a taksama ich uciahvańnia ŭ kompleksnuju prahramu reabilitacyi i papiaredžańnia ciažkich form sacyjalnaj dezadaptacyi.
Narkazaležnym budzie dadzienaje pamiaškańnie dla alternatyŭnaha narkaspažyvańniu baŭleńnia času. Im taksama budzie prapanavana prajści ekspres-test na VIČ i virusny hiepatyt i dadzienaja infarmacyja ab pracy ananimnych kansultatyŭnych punktaŭ.
Dla vyznačeńnia aptymalnych form nieabchodnaj narkaspažyŭcam dapamohi i prafiłaktyčnaj pracy rabotniki centra buduć vyvučać stupień ich uciahnutaści ŭ narkaspažyvańnie. «My budziem analizavać, kolki čałaviek užyvaje, što ŭžyvaje, ci byli sproby spynić, čym jany skončylisia, što pieraškadžaje, što treba ad nas», — rastłumačyŭ Samaryn.
U pierśpiektyvie ŭ centry płanujecca stvaryć karekcyjnyja hrupy dla padletkaŭ z hrup ryzyki, a taksama hrupy dla blizkich svajakoŭ narkazaležnych ludziej.
Centr pracuje z 12.00 da 20.00. U im dziažurać mieniedžar, dva sacyjalnyja rabotniki, psichołah abo kansultant pa zaležnaściach. Z centram supracoŭničajuć 17 aŭtryč-rabotnikaŭ, jakija raspaŭsiudžvajuć infarmacyju pra jaho niepasredna siarod narkaspažyŭcoŭ. Aprača taho, klijenty centra mohuć być nakiravanyja da jurystaŭ i ŭračoŭ roznaj śpiecyjalizacyi, jakija pracujuć addalena.
U centry dziejničajuć šerah praviłaŭ: zabaroniena ŭžyvać abo pranosić psichaaktyŭnyja rečyvy, u tym liku słabaałkaholnyja napoi, nieabchodna pavažliva stavicca da piersanału i davać praŭdzivuju infarmacyju ab svajoj žyćciovaj situacyi.
Centr znachodzicca na vulicy Matusieviča, 12-107, u budynku byłoha dziciačaha sadka. Usie pasłuhi ŭ im akazvajuć ananimna i biaspłatna.