Jeŭrazijskaja ekanamičnaja kamisija padrychtavała prajekt źmianieńniaŭ u dahavor ab JEAES, u adpaviednaści ź jakimi płanujecca dazvolić paralelny impart na terytoryju sajuza asobnych hrup tavaraŭ. Pra heta zajaviŭ žurnalistam 11 sakavika ŭ Maskvie člen kalehii (ministr) pa ekanomicy i finansavaj palitycy JEEK Cimur Sulejmienaŭ.
Pavodle jaho słoŭ, na terytoryi JEAES dziejničaje rehijanalny pryncyp vyčerpvańnia vyklučnaha prava na ab`iekty intelektualnaj ułasnaści, u adpaviednaści ź jakim paralelny impart niemahčymy biez uzhadnieńnia z pravaŭładalnikami. Antymanapolnyja orhany niekatorych krain sajuza inicyjavali lehalizacyju takoha impartu šlacham pierachodu na mižnarodny pryncyp vyčerpvańnia pravoŭ.
JEEK prapanoŭvaje zachavać rehijanalny pryncyp vyčerpvańnia pravoŭ jak adpaviedny metam raźvićcia ekanomik krain — udzielnic sajuza. Razam z tym u kamisii ličać mahčymym dazvolić paralelny impart dla tych hrup tavaraŭ, dzie pravaŭładalniki tavarnych znakaŭ dapuskajuć roznyja złoŭžyvańni. Takim čynam, adznačyŭ ministr, krainy JEAES atrymajuć mahčymaść reahavać na niedastatkovuju kolkaść niejkich hrup tavaraŭ ci na ich nienaležnuju jakaść.
Sulejmienaŭ padkreśliŭ, što pradastaŭleńnie mahčymaści pierachodu na mižnarodny pryncyp vyčerpvańnia pravoŭ pa asobnych hrupach tavaraŭ patrabuje źmianieńniaŭ u dahavor ab JEAES. Pavodle jaho acenki, hetyja papraŭki mohuć być uniesienyja ŭ dahavor užo ŭ 2016 hodzie.
Ministr paviedamiŭ, što rasijski bok nastojvaje na dazvole paralelnaha impartu ŭ dačynieńni da lekaŭ i miedycynskich vyrabaŭ, kazachstanski — aŭtazapčastak. «Hetyja asnoŭnyja dźvie tavarnyja hrupy i ź`iaŭlajucca pradmietam abmierkavańnia», — skazaŭ jon.
Akramia taho, razhladajucca i inšyja hrupy tavaraŭ, u tym liku pradukty charčavańnia, parfumieryja i kaśmietyka. Pavodle słoŭ Sulejmienava, biełaruski bok maje namier vyvučyć prapanovy svaich partnioraŭ.
