Milinkievič padkreśliŭ, što ŭsie biełaruskija demakratyčnyja siły «razam adstojvajuć prava biełarusaŭ žyć u demakratyi i niezaležnaj krainie».
«Demakratyja abaviazkova pryjdzie, ale siońnia dla nas hałoŭnaje — abaranić niezaležnaść, bo jaje možna stracić za adnu noč, i tady nie budzie ni svabody, ni pravoŭ čałavieka, ni Radzimy», — skazaŭ Milinkievič.
Pavodle jaho słoŭ, demakratyčnyja siły vystupajuć za dyjałoh unutry krainy. «Za toje, kab palityčnaja dyskusija pieradusim viałasia nie na vulicach i płoščach, a ŭ mižnarodna pryznanym biełaruskim parłamiencie», — adznačyŭ Milinkievič.
Palityk padkreśliŭ, što demakratyčnyja siły taksama vystupajuć za dyjałoh ź ES: «Dyjałohu niama alternatyvy. Ale jon pavinien budavacca na prazrystych pryncypach, prahmatyčnych adnosinach z zachavańniem pavahi da kaštoŭnaściaŭ. Mohuć być cykły prahresu i rehresu, ale Jeŭropa nie pavinna havaryć: «Nie chočacie z nami — da spatkańnia!» Treba spryjać libieralizacyi i rostu jeŭraaptymizmu jak hramadzian, tak i ŭład našaj krainy. Najvažniejšaje — zachavać tut «smak Jeŭropy».
Pavodle słoŭ Milinkieviča, dyjałoh moža dapamahčy pravieści ŭ Biełarusi sumlennyja vybary. «Nam vielmi važna, kab biełaruskija parłamientaryi jak roŭnyja z roŭnymi byli pradstaŭlenyja ŭ Jeŭranieście, — skazaŭ jon. — Siońnia my prapanoŭvajem kampramisny varyjant «5+5» (pałova delehacyi ad Pałaty pradstaŭnikoŭ, pałova — ad hramadzianskaj supolnaści). Jość nadzieja, što vybary ŭ naš parłamient u 2016 hodzie projduć užo adkryta, spraviadliva, my paličym hałasy razam z uładami — i ŭ hetaj zale Biełaruś budzie pradstaŭlać paŭnacennaja delehacyja».
Milinkievič dadaŭ: «My taksama vitajem zaprašeńnie aficyjnaj biełaruskaj delehacyi na Ryžski samit Uschodniaha partniorstva ŭ mai, ale ličym, što na im pavinien być pačuty hołas hramadzianskaj supolnaści i biełaruskaj apazicyi».
17—18 sakavika ŭ Jerevanie prachodzić čaćviortaje plenarnaje pasiadžeńnie Parłamienckaj asamblei Uschodniaha partniorstva (Jeŭraniest). U pasiadžeńni rabočaj hrupy pa Biełarusi Jeŭraparłamienta napiaredadni ŭdzielničali pradstaŭniki siami apazicyjnych struktur Biełarusi: lidary Biełaruskaj partyi levych «Spraviadlivy śviet» Siarhiej Kalakin, Biełaruskaj sacyjał-demakratyčnaj partyi (Hramada) Iryna Vieštard, ruchu «Za Svabodu» Alaksandr Milinkievič, kampanii «Havary praŭdu» Uładzimir Niaklajeŭ, AHP Anatol Labiedźka, namieśnik staršyni Partyi BNF Ryhor Kastusioŭ i sustaršynia arhkamiteta pa stvareńni partyi «Biełaruskaja chryścijanskaja demakratyja» Vital Rymašeŭski.
