Słavuty biełaruski muzyka Hienadź Starykaŭ pamior 20 sakavika va ŭzroście 65 hadoŭ. Ab hetym partału Tuzin.fm paviedamiŭ siabar muzyki Siarhiej Zanimoniec.
U pačatku lutaha Hienadzia Starykava pakłali ŭ balnicu, kab zrabić apieracyju na sercy, ale pry abśledavańni znajšli prablemy ź lohkimi i adpravili na lačeńnie. «Hienadź apošni čas kiepska siabie adčuvaŭ, dva tydni z tempieraturaj doma siadzieŭ, a dahetul u balnicy schapiŭ zapaleńnie lohkich i trapiŭ u reanimacyju, ale tady abyšłosia», — adznačyŭ Zanimoniec. Papiaredniaja pryčyna śmierci Hienadzia Starykava — aciok lohkich.
Miarkujecca, što raźvitańnie z muzykam adbudziecca 22 sakavika. Infarmacyja ab miescy i časie budzie paviedamlena dadatkova.
Hienadź Starykaŭ naradziŭsia ŭ 1950 hodzie ŭ Minsku. Vučyŭsia ŭ Biełaruskim politechničnym instytucie, skončyŭ Minskaje muzyčnaje vučylišča pa kłasie kłasičnaj hitary i dyryžyravańnia (1984). Pačaŭ vystupać u składzie minskich bit-hurtoŭ ź siaredziny 1960-ch. Ihraŭ u hurtach «2+2», «Ałharytm», «Fakir», «Čary». U 1978 hodzie byŭ zaprošany ŭ skład VIA «Vierasy», u 1982—1983 hadach źjaŭlaŭsia ŭdzielnikam ansambla «Tonika», u 1987—1990 hadach — hitaryst arkiestra Minskaha cyrka. U 1995 hodzie zasnavaŭ «Star-kłub» — niefarmalnaje abjadnańnie muzykaŭ i amataraŭ bluza, naładžvaŭ fiestyval «Bluz žyvie ŭ Minsku».
