Ale pravierkaj hatoŭnaści našaj krainy da palapšeńnia adnosinaŭ z Savietam Jeŭropy stanie dzień prezidenckich vybaraŭ.
Parłamienckaja asambleja Savieta Jeŭropy hatovaja da dyjałohu ź Biełaruśsiu. Pra heta 21 krasavika zajaviŭ dakładčyk pa Biełarusi kamisii PASIE pa palityčnych pytańniach i demakratyi Andrea Ryhoni. U Strasburhu na pasiedžańni kamiteta asamblei pa palityčnych pytańniach i demakratyi prysutničali i pradstaŭnik biełaruskaha parłamienta (Mikałaj Samasiejka, staršynia kamisii pa mižnarodnych spravach Pałaty pradstaŭnikoŭ), i pradstaŭniki hramadzianskaj supolnaści (pravaabaronca Valancin Stefanovič i hramadski dziejač Aleś Łahviniec).
«My hatovyja da dyjałohu z vami, my adkrytyja dla hetaha. Vielmi važna zakłaści asnovy dla dyjałohu. Naš kamitet moh by hetamu sadziejničać», — cytuje słovy Ryhoni BIEŁTA.
BiełaPAN dadaje, što Andrea Ryhoni źviarnuŭ uvahu na nievyrašanuju prablemu śmiarotnaha pakarańnia ŭ Biełarusi, što maratoryj tak i nie byŭ uviedzieny. Havaryŭ jon i pra cisk na palitviaźnia Mikołu Statkieviča. Na dumku śpiecdakładčyka, Savietu Jeŭropy i PASIE treba pierakanacca ŭ tym, što ŭ kiraŭnictva Biełarusi jość vola i žadańnie prytrymlivacca hałoŭnych jeŭrapiejskich kaštoŭnaściaŭ. «Kampramisaŭ tut być nie moža», — padkreśliŭ Andrea Ryhoni.
Ryhoni adznačyŭ, što dzień prezidenckich vybaraŭ u Biełarusi «stanie važnaj pravierkaj taho, nakolki Biełaruś imkniecca da palapšeńnia ŭzajemaadnosinaŭ z Savietam Jeŭropy i inšymi mižnarodnymi arhanizacyjami».
