«Važak»-krasovier, natchniony ZAZ-965. Vyjava: RHAU-MSCHA/Alaksandr Maskavinaŭ
«Važak»-usiedarožnik, natchniony HAZ-69. Vyjava: RHAU-MSCHA/Alaksandr Maskavinaŭ
Łabaratoryja transpartnych srodkaŭ sielskahaspadarčaha pryznačeńnia rasijskaha ahrarnaha ŭniviersiteta imia Cimirazieva viadzie raspracoŭku krasoviera i pazadarožnika sieryi «Važak», asnovaj dyzajnu jakich stanuć «kłasičnyja» savieckija mašyny, raspaviadajuć «Iźviestija».
Abodva aŭtamabili raspracavanyja na 30-40%, śćviardžaje kiraŭnik prajektu. Hatovy prajekt moža zacikavić patencyjnych inviestaraŭ z rasijskich aŭtazavodaŭ.
Dy kiraŭnik prajektu narakaje: aŭtavytvorcy praz kryzis nie šukajuć novych napracovak.
«Taja mašyna, pra jakuju my havorym, dakładna nie budzie «Zaparožac» u prostym sensie słova, choć by tamu, što jana nie budzie vyrablacca ŭ Zaparožžy, — kaža pra krasovier Tenhizi Dzacenidze, zahadčyk łabaratoryi, što raspracoŭvaje «Važakoŭ». — Z «Zaparožcam» jana budzie źviazanaja niejkimi źniešnimi rysami, što nahadajuć hety znakavy aŭtamabil, formami».
Pavodle jaho słoŭ, pazadarožnik nie budzie mieć zapazyčańniaŭ u dyzajnie ad HAZ-69, ale budzie «fiłasofski blizkim» da jaho idei.
Krasovier-«Zaparožac» pa raźlikach kanstruktaraŭ budzie kaštavać kala 5400 dalaraŭ i budzie tannaj alternatyvaj Lada Kalina.
«Važaki», na dumku kanstruktaraŭ, buduć zapatrabavanyja u śfierach handlu, servisu, turyzmu i pasłuh, a taksama na sielskich terytoryjach.
Stvaralniki «Važakoŭ» nahadvajuć pra paśpiachovaje adradžeńnie kłasičnaha «Žuka», Volkswagen Beetle ŭ 1997 hodzie, kłasičnaha MINI ŭ 2001-m i Fiat 500 u 2007-m.
***
«Zaparožcy» ZAZ-965 vyrablalisia zaparožskim zavodam «Kamunar» z 1960 pa 1969 hod i adnosilisia da paraŭnalna dastupnych aŭtamabilaŭ asabliva kampaktnaha kłasu mikralitražak. Z 1966 pa 1994 hod vyrablalisia nastupnaje pakaleńnie «Zaparožcaŭ» — ZAZ-966 i ZAZ-968 ź inšymi abrysami kuzava.
HAZ-69 (u narodzie «koźlik») vyrablaŭsia z 1952 pa 1972 hod na Horkaŭskim i Uljanaŭskim aŭtazavodach i byŭ jak vajskovym, tak i hramadzianskim aŭtamabilem. Mieŭ papularnaść praź nizkuju canu i vysokuju prachodnaść. Vykarystoŭvaŭsia jak usiedarožnik i mikraaŭtobus.
