U pačatku sakavika z uzłamanaj paštovaj skryni Leanida Sudalenki na adras padatkovaj inśpiekcyi Savieckaha rajonu Homiela nieviadomyja dasłali niekalki parnahrafičnych rolikaŭ. Raspaŭsiud parnahrafii nibyta adbyŭsia z IP-adrasu, zarehistravanaha na vuł. Paleskaj, 52, dzie mieścicca RHA «Pravavaja inicyjatyva». Kiraŭnikom jaje źjaŭlajecca Sudalenka.
U krasaviku ŭ chacie i ofisie pravaabaroncy prajšli vobšuki. U jaho kanfiskavali niekalki sistemnych błokaŭ ad kampjutaraŭ, noŭtbuk, jaki naležyć synu. Naviny pra raspaŭsiud porna byli dla Sudalenki jak hrom siarod jasnaha nieba.
«Ja daviedaŭsia pra vobšuki, kali byŭ u Stakholmie na pravaabarončaj kanfierencyi. Zatym viarnuŭsia i razam z advakatam pajšoŭ u miascovaje adździaleńnie Śledčaha kamiteta. Tam mnie paviedamili, što spravu pa raspaŭsiudzie porna raspačali, ale nie suprać mianie, a prosta pa fakcie, — tłumačyć Sudalenka. – Ja prachodžu jak śviedka».
Jašče da hetych padziej, u studzieni, pravaabaronca skardziŭsia ŭ techpadtrymku mail.ru na toje, što jahonuju paštovuju skryniu ŭzłamali nieviadomyja. Skany hetaj pierapiski Sudalenka taksama pradastaviŭ śledčym.
«Ja byŭ u Śledčym kamitecie 14 krasavika, usio rastłumačyŭ. Mnie skazali, što vykličuć, kali spatrebicca. Pakul što — cišynia, — kaža Sudalenka. — A sistemnyja błoki nichto jašče nie viarnuŭ. Nibyta ŭsia technika znachodzicca na ekśpiertyzie».
