Rolik sacyjalnaj rekłamy, źniaty na Ukrainie napiaredadni 9 maja, moža nanieści ŭdar pa ŭtulnych padańniach rasijskaha hramadstva pra toje, što Rasija zaraz praciahvaje spravu pieramožcaŭ u Vialikaj Ajčynnaj, «vajujučy z fašystami na ŭschodzie Ukrainy», — piša rasijskaja słužba Radyjo Svaboda.
Šerah karystalnikaŭ, praŭda, vykazvała zaściarohi, što vieteran u filmie zusim nie vyhladaje na svaje 90 hadoŭ, a vyhladaje na 70 hadoŭ.
Tak i jość, akcioru Uładzimiru Tałašku, što syhraŭ Dzieda, — 69 hadoŭ. Ale sp. Uładzimir vykanaŭ rolu ŭ filmie Leanida Bykava «V boj idut odni stariki» (1973) — ci ŭ nie najlepšaj stužcy pra Vialikuju Ajčynnuju na prastorach byłoha SSSR. I rolik — pierajemnaść siońniašnich padziej z padziejami 1940-ch. I pačynajecca rolik słohanam na samalocie «Budziem žyć» — kryłataj frazaj ź filma Leanida Bykava.
Uładzimir Tałaška syhraŭ u filmie hieroja staršaha lejtenanta Siarhieja Skvarcova — taho samaha, što vykonvaŭ znakamituju «Nič jaka miesiačna». U filmie Siarhiej Skvarcoŭ hinie, a na 13-j siekundzie rolika my možam pabačyć fatahrafiju Skvarcova na ścianie.
Uładzimir Tałaška naradziŭsia ŭ Makiejeŭcy ŭ Danieckaj vobłaści, tam dzie zaraz idzie vajna. Sp. Tałaška daŭ intervju rasijskaj słužbie Radyjo Svaboda.
Jon kaža, što film «U boj iduć adny staryki» ŭ tym liku i pra Ukrainu. Bo sam hieroj Leanida Bykava (major Citarenka) kaža z adnym z epizodaŭ,
«jak ža vy nie zaŭvažyli, vy nad majoj Ukrainaj bilisia?».
— «A jak tut zaŭvažyć?» - «E, nie, tut ziamla zielaniejšaja, pavietra bolš błakitnaje, dy nieba bolš błakitnaje».
«Miž inšym, hadoŭ 25 tamu, — zaznačaje Tałaška, — jašče byŭ žyvy Rastocki sa svaim znakamitym «A zory tut cichija …», jon i inšyja režysiory pradstaŭlali svaje filmy, i «Baładu pra sałdata», i «Baćku sałdata», na fiestyvali, jaki tak i nazyvaŭsia, «Kino pieramohi». I film «U boj iduć adny staryki» Bykava, narodnaha artysta Ukrainy, majho ziemlaka z Kramatorska (a ja z Makiejeŭki, z Danbasa), byŭ pryznany najlepšym filmam.
Siońnia soramna mnie čuć, i, ja dumaju, vieteranam ŭkrainskaj armii, ukraincam, prosta vieteranam, soramna i kryŭdna, što niejki čynuša pryznaŭ, što vajnu vyjhrała tolki adna nacyja. Heta niapraŭda. Nie, heta i naša pieramoha, — kaža Tałaška.
«Maja babula, jakaja pieražyła akupacyju, — kaža akcior, — pieražyła vajnu, kazała: hałoŭnaje, kab nie było vajny.
Ja nie dumaju, što maje adnahodki mahli ŭjavić, što vajna moža da nas pryjści mienavita z boku rasijskich miežaŭ.
Ja ciapier nie kažu ab ruskim narodzie, bo ja časta tam byvaju, šmat viedaju ludziej razumnych, pradstaŭnikoŭ mastactva, kultury, jakija nie padtrymlivajuć kramloŭskija zamaški. Nichto nie čakaŭ, što vajna pačniecca z hetaha boku, tamu siońnia treba ščyra skazać, što tak, heta prosta ŭvarvańnie impierskich ambicyj Kramla, tamu što sychodziŭ z-pad upłyvu ceły narod….».
Pramarolik telekanała «Inter» pa matyvach filma «U boj iduć adny staryki». Amal 1 młn prahladaŭ.
