Pavodle ŭmovaŭ sioletniaha konkursu razhladalisia zajavy ad kankursantaŭ da 27 hod.
U naminacyju «Kavier» prymalisia viadomyja biełaruskamoŭnyja (ci pierakładzienyja na biełaruskuju) pieśni va ŭłasnym aryhinalnym pračytańni. Było atrymana 22 zajavy. Kankursanty pieraśpiavali pieśni hurtoŭ J:Mors, Akute, Zet, «Krama», «Pieśniary», «Vierasy», «Siabry», Kriwi, «Krambambula», Naka, «Novaje Nieba», «Biez bileta», Viktara Šałkieviča dy inšych, u tym liku pryjšło dva kavery na «Kupalinku» i adzin na Adele. Cikava, što ŭ konkursie akrom biełaruskich muzykaŭ upieršyniu ŭziali ŭdzieł i pradstaŭniki inšaj krainy – hurt «Kolir:pijana» z Adesy padaŭ zajavy adrazu ŭ dźvuch naminacyjach.
U naminacyi «Śpiavanaja paezija» padadziena 33 zajavy. Pavodle ŭmovaŭ, nieabchodna było samastojna vybrać vierš viadomaha sučasnaha biełaruskaha paeta na biełaruskaj movie i vykanać jaho va ŭłasnaj maniery na svaju muzyku. Kankursanty śpiavali na słovy Hienadzia Buraŭkina (ažno čatyry pieśni!), Ryhora Baradulina, Janki Kupały, Maksima Bahdanoviča, Uładzimira Karatkieviča, Anatola Sysa, Niła Hileviča, Aviarjana Dzieružynskaha, Paŭluka Trusa, Viktara Žybula, Valanciny Akołavaj, Jaŭhienii Janiščyc, Łarysy Hienijuš, Anatola Viarcinskaha, Andreja Chadanoviča, Alesia Płotki, Dzianisa Sidarka, Iryny Zorka, Andreja Alaksandrava, Iryny Bahdanovič, Aksany Stryžyč, Viktara Łupasina, Mikity Najdzionava dy inšych. Z poŭnym śpisam kankursantaŭ možna aznajomicca tut.
«Prosta vydatna, što kankursanty achapili roznyja płasty biełaruskaj sučasnaj muzyki i paezii.
Zastajecca tolki radavacca, što śpievy «Pieśniaroŭ», «Kramy» i «Novaha Nieba», paezija Kupały, Bahdanoviča i Trusa ŭsprymajecca moładziu jak sučasnaja. Značyć jana nie stračvaje svajoj aktualnaści i natchniaje inšaje pakaleńnie na stvareńnie novych tvoraŭ. Vybirać sapraŭdy jość z kaho!», – zaznačajuć arhanizatary konkursu.
Usie pieśni ŭvažliva adsłuchaje žury, u jakoje ŭvachodziać: muzyki Ihar Varaškievič («Krama»), Valery Dajnieka («Biełaruskija Pieśniary») i Aleh Chamienka («Pałac»), paety Adam Hlobus i Vital Ryžkoŭ, kulturolah Maksim Žbankoŭ, žurnalistkaTaciana Zamiroŭskaja i pradstaŭniki arhkamitetu konkursu – Pavieł Bierahovič (kiraŭnik fondu «Viartańnie»), Nina Šydłoŭskaja (kaardynatar kampanii «Budźma biełarusami!») i Siarhiej Budkin (pradusar konkursu, hałoŭny redaktar partału Tuzin.fm).
Pryzavy fond konkursu składaje 1000 jeŭra
Jon moža być padzieleny miž niekalkimi vykanaŭcami. Pry hetym u konkursie moža być i adzin pieramožca, bo niekatoryja vykanaŭcy padali zajavy ŭ abiedźviuch naminacyjach. Vyniki buduć abvieščanyja 14 traŭnia na partałach Tuzin.fm, Tut.by, Budzma.by. Pra ŭznaharodžańnie pieramožcaŭ i finalny kancert z hetaj nahody budzie paviedamlena dadatkova.
