U krasaviku 2015 hoda spažyvieckija ceny na tavary i pasłuhi ŭ Biełarusi vyraśli ŭ paraŭnańni z sakavikom na 0,9%, sa śniežniem 2014 hoda — na 5,9%, paviedamlaje pres-słužba Nacyjanalnaha statystyčnaha kamiteta.
Ceny na charčovyja tavary za miesiac vyraśli na 0,7%. Najbolš istotna padaraželi: aharodnina — na 8,3%, bulba — na 3,4%, čaj — na 2,7%, makaronnyja vyraby — na 1,8%, ryba i morapradukty — na 1,3%.
Źnizilisia ceny na miasa i ptušku — na 1,1%, masła i frukty — na 0,6%, jajki — na 0,2%.
Ceny na niecharčovyja tavary ŭ krasaviku ŭ paraŭnańni z sakavikom pavialičylisia na 0,8%. Bolš za ŭsio ŭ krasaviku padaraželi miedykamienty — na 3,2%, viełasipiedy i matacykły — na 2,6%, piśmovyja pryłady — na 1,8%, posud, prybory stałovyja — na 1,7%, parfumierna-kaśmietyčnyja tavary — na 1,2%.
Źnizilisia ceny na dyvany i dyvanovyja vyraby — na 1,1%, na hadzińniki — na 0,9%, na meblu — na 0,2%.
Ceny i taryfy na płatnyja pasłuhi za miesiac pavysilisia na 1,6%. Bolš za inšyja padaraželi žyllova-kamunalnyja pasłuhi — na 2,1%, u tym liku elektrazabieśpiačeńnia — na 1,2%, hazazabieśpiačeńnia — na 1%, vodazabieśpiačeńnia — na 3,2%, techabsłuhoŭvańnia žyłych pamiaškańniaŭ — na 2,9%, aciapleńnia — na 1,2%. Akramia taho, padaraželi pasłuhi kultury — na 1,5%, u tym liku kinateatraŭ i videasałonaŭ — na 1,8%, teatraŭ — na 2%, kancertnych arhanizacyj — na 0,4%. Sanatorna-azdaraŭlenčyja pasłuhi padaraželi za krasavik na 1,4%, miedycynskija — na 1%, suviazi — na 4,3%, bytavyja — na 1,5%.
Źnizilisia taryfy na pasłuhi pasažyrskaha transpartu — na 1,4%, u tym liku pavietranaha — na 3,3%, mižnarodnaha čyhunačnaha — na 4,2%.
Nahadajem, asnoŭnymi kirunkami hrašova-kredytnaj palityki Biełarusi na 2015 hod pryrost cen byŭ praduhledžany na ŭzroŭni nie bolš čym 12%. Adnak u kancy studzienia metavy aryjencir inflacyi ŭ 2015 hodzie byŭ vyznačany Nacbankam na ŭzroŭni 18% z dapuščalnym adchileńniem u 2%.
U 2014 hodzie inflacyja ŭ Biełarusi značna pieravysiła prahnozny paramietr i skłała 16,2%.
