Bolš za 250 zakanadaŭčych aktaŭ, što tyčacca kulturnaj śfiery, – ad rašeńniaŭ rajvykankamaŭ da zakonaŭ – abjadnali ŭ adziny Kodeks. Užo na vosieńskaj siesii jaho ŭ pieršym čytańni razhledziać deputaty. Raspracoŭščyki kažuć, što dakumient nie maje anałahaŭ u śviecie, i nazyvajuć jaho jurydyčnaj encykłapiedyjaj kultury. Źmiest 227 staronak abmierkavali členy profilnaj parłamienckaj kamisii.
Fota Volhi Šukajła, Tut.by
— My amal ničoha nie źmianili, a prosta sistematyzavali ŭ Kodeksie tyja normy, jakija ŭžo isnujuć, – pryznaŭsia ministr kultury Barys Śviatłoŭ.
Kodeks ab kultury padzieleny na 5 raździełaŭ, 28 hłaŭ i 257 artykułaŭ. Pałažeńni raspracoŭvali apošnija try hady. U bazavym dakumiencie prapisany ahulnyja normy. Ale profilnamu ministerstvu i miascovym uładam pakinuli prava ŭnosić peŭnyja ŭdakładnieńni ci łakalnyja pastanovy admysłovymi zakanadaŭčymi aktami.
— U Kodeks ab kultury ŭvajšli asnoŭnyja pałažeńni tych zakanadaŭčych aktaŭ, jakimi my karystajemsia i ciapier, – skazała na pasiedžańni pieršy namieśnik ministra kultury Iryna Dryha. – My išli ad praktyki i pad heta pisali asobnyja pałažeńni dakumienta. My ŭličyli pamyłki i likvidavali prabieły i supiarečnaści, jakija zaraz isnujuć.
Paśla raboty nad pamyłkami ŭ siońniašnim zakanadaŭstvie ŭ Kodeks dadali normu, jakaja budzie bolš detalova rehulavać paradak praviadzieńnia archieałahičnych daśledavańniaŭ. Jana nakiravana suprać tak zvanych čornych kapacielaŭ. U Ministerstvie kultury kažuć, što praź ich dziejnaść kraina stračvaje šmat svaich historyka-kulturnych kaštoŭnaściaŭ.
Paśla pryniaćcia dakumienta pravodzić archieałahičnyja raskopki biez dazvołu Nacyjanalnaj akademii navuk zabaroniać. A znachodki, u tym liku i vypadkovyja, treba budzie abaviazkova addać va ŭłasnaść dziaržavy.
— Aŭtary dakumienta ŭdakładnili i značna skaracili šerah umoŭ, jakija dazvalajuć nadavać abjektam ci pradmietam status historyka-kulturnaj kaštoŭnaści, — raspavioŭ staršynia pastajannaj kamisii Pałaty pradstaŭnikoŭ pa adukacyi, kultury i navucy Alaksandr Siahodnik.
U novym dakumiencie pašyryli śpis tych, chto zajmajecca kulturnaj dziejnaściu. Siarod inšych, tudy dadali sponsaraŭ i miecenataŭ. Aŭtary dakumienta raźličvajuć, što heta dapamoža pryciahnuć u hetuju halinu bolš inviestycyj.
Kodeks harantuje i kulturnuju padtrymku abjadnańniam biełarusaŭ zamiežža.
— Nam pastupiła prapanova ad Ministerstva justycyi, jakaja tyčycca realizacyi Dekreta №3 (ab darmajedach. – TUT.BY). Na ich dumku, u Biełarusi nieabchodna stvaryć rejestr tvorčych sajuzaŭ. Ich členy buduć pryznavacca tvorčymi rabotnikami. Heta źjavicca padstavaj dla pryznańnia taho, što čałaviek udzielničaje ŭ finansavańni dziaržaŭnych vydatkaŭ, – anansavała mahčymyja źmieny namieśnica staršyni pastajannaj kamisii Pałaty pradstaŭnikoŭ pa adukacyi, kultury i navucy Natalla Kučynskaja.
— Taksama płanujecca stvaryć kamisii, jakija buduć vyrašać sprečnyja pytańni ŭ dačynieńni da volnych mastakoŭ, jakija nie majuć dačynieńnia da sajuzaŭ, – dadaŭ ministr kultury Barys Śviatłoŭ.
Tekst Kodeksa ab kultury chutka pavinien źjavicca ŭ volnym dostupie ŭ interniecie. Da abmierkavańnia dakumienta deputaty abiacajuć padklučyć tvorčyja sajuzy dy inšych zacikaŭlenych.
