Siońnia ŭ Kijevie pradstaŭniki ŁHBT-supolnaści pravodzili «Marš roŭnaści» na Abałonskaj nabiarežnaj. U pačatku šeścia kala 30 ahresiŭna nastrojenych maładych ludziej pryjšli na miesca zboru ŭdzielnikaŭ «Marša roŭnaści». Jany raspylili ŭ natoŭp ślezaciečny haz, kidali dymavyja šaški i pietardy.
Pravaachoŭniki vystrailisia kardonam i nie dapuścili adkrytaha sutyknieńnia pamiž udzielnikami maršu i praciŭnikami ŁHBT-akcyi. Adnak paciarpieli niekalki supracoŭnikaŭ milicyi.
Za supraćpraŭnyja dziejańni na miescy zdareńnia pravaachoŭniki zatrymali 25 čałaviek.
U ich kanfiskavali pietardy, adviortki, nažy i inšyja niebiaśpiečnyja pradmiety. Pačata kryminalnaja vytvorčaść pa č. 4 art. 296 KK Ukrainy (chulihanstva).
Kolkaść paciarpiełych milicyjantaŭ padčas sutyknieńniaŭ na «Maršy roŭnaści» siońnia ŭ Kijevie ŭzrasła da dzieviaci, paviedamili ŭ Adździele suviaziaŭ z hramadskaściu Hałoŭnaha ŭpraŭleńnia MUS u Kijevie.
Mer Kijeva Vital Kličko adznačyŭ, što ŭ Kijevie niama ŭcisku ni pa jakich prykmietach, i kožnamu čałavieku harantujecca svabodnaje vykazvańnie pohladaŭ i pierakanańniaŭ.
Jon patrabuje pakarać tych, što ŭčynili pravakacyi i sutyknieńni z pravaachoŭnymi orhanami ŭ Kijevie.
«Ja liču, što palityčnyja siły, jakija vystupali suprać maršu, «padahreli» situacyju, sprabujučy stvaryć sabie sumniŭny pijar na temie pravoŭ mienšaściaŭ. Za niekalki dzion da maršu ja zaklikaŭ palityčnyja siły i hramadskija arhanizacyi nie raspalvać varožaść i nie stvarać supraćstajańnie ŭ stalicy vakoł «Maršu roŭnaści», — cytuje Kličko pres-słužba mera.
Jon padkreśliŭ, što milicyja vykonvała svoj abaviazak, zabiaśpiečvajučy paradak, i padobnyja vypadki napadu ahresiŭna nastrojenych asob na pravaachoŭnikaŭ źjaŭlajucca niedapuščalnymi.
«Va ŭmovach, kali kraina supraćstaić źniešniaj ahresii, pravaparadak na miescach, biaśpieka — heta hałoŭnaje. Tamu ŭsie, chto zładziŭ biesparadki, pavinny być žorstka pakaranyja. Ja asabista biaru hetaje pytańnie pad kantrol «, — padkreśliŭ Kličko.
