Ministr enierhietyki Litvy Rokas Masiulis zajaviŭ, što pieraškodaj dla ekspartu hazu va Ukrainu źjaŭlajecca pazicyja «Hazproma», pieradaje Reuters.
Pa słovach ministra, Litva hatovaja pačać pastaŭki va Ukrainu z terminała pa pryjomie zvadkavanaha hazu «Niezaležnaść» u luby čas, adnak «Hazprom» admoviŭ u tranzicie praź Biełaruś.
«My prasili aperatara biełaruskaj hazatranspartnaj sistemy prapuścić naš haz. Apierataram sistemy źjaŭlajecca «Hazprom». My atrymali admoŭny adkaz, što haz transpartavać niemahčyma. My nie zhodnyja z hetym», — zajaviŭ Masiulis. «Heta palityka, jakaja ŭskładniaje spravu… My mahli b pačać ekspart siońnia, kali b nam dazvolili», — dadaŭ Masiulis.
Ministr taksama dadaŭ, što pašyreńniu litoŭskaha ekspartu pieraškadžajuć kantrakty «Hazproma», zaviazanyja na schiemu «biary abo płaci». Pavodle Rokasa Masiulisa, upłyŭ litoŭskaha terminała pa pryjomie zvadkavanaha hazu vyjavicca na praciahu nastupnych piaci hadoŭ. «Usie viedajuć, što mohuć vykarystoŭvać jaho i buduć pamiatać pra heta pry zaklučeńni novych pahadnieńniaŭ», — dadaŭ jon.
U sakaviku 2015 hoda Masiulis kazaŭ pra rolu, jakuju novy terminał adyhraje ŭ rehijonie. «Ja dumaju, što «Hazpromu» jość čaho bajacca. Naša meta — kab našy spažyŭcy płacili za haz jak maha mienš <…> Pabudavaŭšy terminał, my ŭžo možam vieści pieramovy z kožnym, i heta zabiaśpiečvaje atrymańnie hazu pa lepšaj canie — budź-to «Hazprom» abo budź-to zvadkavany haz», — cytavaŭ ministra partał Delfi.
