Fota: 3news.co.nz
Centrabank Zimbabve abvieściŭ pra kančatkovuju admovu ad nacyjanalnaj valuty zimbabvijskaha dalara. Demanietyzacyja pačniecca 15 červienia i maje zavieršycca 30 vieraśnia. Kraina kančatkova piarojdzie na amierykanski dalar i inšyja zamiežnyja valuty.
Bankaŭskija rachunki ŭ zimbabvijskich dalarach buduć pieraviedzienyja ŭ dalary ZŠA. Kali na rachunku 175 kvadryljonaŭ (miljonaŭ miljardaŭ) zimbabvijskich dalaraŭ ci mienš, budzie vypłačana 5 amierykanskich dalaraŭ.
Kali na rachunku bolš za 175 kvadryljonaŭ, uładalniki atrymajuć pa dalary ZŠA za kožnyja 35 kvadryljonaŭ zimbabvijskich dalaraŭ.
Nasielnictva moža zdać najaŭnyja zimbabvijskija dalary ŭ banki. Adzin amierykanski dalar daduć za 250 tryljonaŭ (tysiač miljardaŭ) zimbabvijskich uzoru 2009 hoda albo za 250 tryljonaŭ uzoru 2008 hoda.
***
Zimbabve pierajšła na «mnohavalutnuju sistemu» (faktyčna — zamianiła svaju valutu na dalar ZŠA) u 2009 hodzie paśla praciahłaj hipierinflacyi. Inflacyja nabyła ŭ Zimbabve pahroźlivyja tempy (20-60% za hod) na pačatku 1990-ch i dasiahnuła piku ŭ 2008 hodzie (byŭ ustalavany suśvietny rekord — 89 700 000 000 000 000 000 000% za hod).
Niahledziačy na niaspynnuju inflacyju, Zimbabve praciahvała vypuskać i pieravypuskać banknoty i navat maniety. Samaja «mnohanulavaja» kupiura mieła naminał 100 tryljonaŭ.
Krainaj z 1987 hoda pa siońniašni dzień kiruje Robiert Muhabe. U 2015 hodzie jamu spoŭniŭsia 91 hod, kanstytucyja dazvalaje jamu zastavacca prezidentam da 99 hadoŭ.
Hladzicie taksama: Inflacyja ŭ Biełarusi — infahrafika