Biełaruś uvajšła ŭ dziasiatku najhoršych krain dla pracoŭnych pavodle viersii Mižnarodnaj kanfiederacyi prafsajuzaŭ (MKP). Takija źviestki ŭtrymlivajucca ŭ hłabalnym indeksie pa pravach pracoŭnych za hety hod, jaki MKP prezientavała 10 červienia na 104-j siesii Mižnarodnaj kanfierencyi pracy ŭ Ženievie. Vyniki daśledavańnia taksama apublikavanyja na sajcie Usiejeŭrapiejskaha rehijanalnaha savieta MKP.
Akramia Biełarusi ŭ katehoryju najhoršych dla pracoŭnych krain taksama adniesienyja Hvatemała, Jehipiet, Katar, Kitaj, Kałumbija, Abjadnanyja Arabskija Emiraty, Pakistan, Saudaŭskaja Aravija i Svazilend.
U ahulnym krainavym rejtynhu abarony pravoŭ pracoŭnych Biełaruś zaniała 12-je miesca sa 141-ha i była vyznačanaja ŭ piatuju z šaści katehoryj jak dziaržava, dzie nie harantujecca vykanańnie pravoŭ pracoŭnych. U hetuju katehoryju adniesienyja 27 krain Azii, Afryki, Centralnaj i Paŭdniovaj Amieryki, Cichaakijanskaha rehijonu i Jeŭropy, u pryvatnaści Biełaruś, Ukraina i Hrecyja.
Najbolš spryjalnaja situacyja z abaronaj pravoŭ pracoŭnych adznačanaja ŭ 16 krainach, uklučajučy Finlandyju i Uruhvaj. Tut u 2015 hodzie naziralisia tolki adzinkavyja parušeńni pravoŭ. U 26 krainach, u tym liku Irłandyi i Japonii, byli zafiksavanyja paŭtornyja parušeńni pravoŭ pracoŭnych. Rehularnyja parušeńni adznačalisia ŭ 36 krainach, u tym liku ŭ Aŭstralii i Izraili. Sistemnyja parušeńni składalniki indeksa vyjavili ŭ 27 dziaržavach, siarod jakich Polšča i ZŠA. Katastrafičnaja situacyja adznačanaja ŭ dzieviaci krainach, u tym liku ŭ Siryi, Centralna-Afrykanskaj Respublicy i Paleścinie, dzie harantyi pravoŭ pracoŭnych adsutničajuć z pryčyny parušanaj sistemy viaršenstva zakonaŭ.
Mižnarodnaja kanfiederacyja prafsajuzaŭ źbiraje źviestki ab parušeńniach pravoŭ pracoŭnych u śviecie bolš jak 30 hadoŭ. Sioleta MKP u druhi raz prezientavała vyniki svajho daśledavańnia ŭ vyhladzie hłabalnaha indeksa, jaki vyznačajecca pa 97 pakazčykach i ŭličvaje ŭzrovień abarony pracoŭnych pravoŭ na zakanadaŭčym uzroŭni i na praktycy. Hetaje daśledavańnie pryznačanaje dla pradstaŭnikoŭ biźniesu i ŭradaŭ.
