Niaščasny vypadak adbyŭsia dniom 12 červienia. Pavodle papiaredniaj infarmacyi, u akvaparku adpačyvali dzieci z pačatkovych kłasaŭ adnoj sa škoł Drahičynskaha rajona.
«Padčas kupańnia druhakłaśnica ŭpała ŭ vadu. Vyciahnuli ŭžo siniaje cieła, chutkaja doŭha reanimavała i z dyjahnazam kliničnaja śmierć dastaviła ŭ balnicu», — paviedamiła čytačka, dadaŭšy, što dziaŭčynku dastaŭ z vady adzin z naviedvalnikaŭ akvaparku.
Paciarpiełuju, jakaja znachodzicca ŭ komie, miedyki dastavili ŭ Kobrynskuju CRB, zatym u reanimacyjnaje adździaleńnie Bresckaj dziciačaj abłasnoj balnicy. Pavodle źviestak na ranicu 15 červienia, stan dziaŭčynki charaktaryzujecca jak vielmi ciažki.
U adździele adukacyi Drahičynskaha rajona paćvierdzili infarmacyju ab traŭmavanaj školnicy. Pa słovach načalnika adździeła Dźmitryja Ihnatčyka, dzieci pajechali ŭ arhanizavanuju pajezdku ŭ Kobrynski akvapark. Supravadžali vučniaŭ dvoje nastaŭnikaŭ. Paciarpiełaja dziaŭčynka sioleta skončyła pieršy kłas.
Abstaviny padzieńnia dziciaci ŭ vadu ŭdakładniajucca. Na miescy zdareńnia pracavali kobrynskija pravaachoŭniki.
Pavodle infarmacyi TUT.BY, śledčyja raspačali ŭ dačynieńni da nastaŭnikaŭ, jakija supravadžali hrupu, kryminalnuju spravu pa č. 1 art. 165 KK
— «Nienaležnaje vykanańnie abaviazkaŭ pa harantavańni biaśpieki žyćcia i zdaroŭja dziaciej, što paciahnuła pryčynieńnie małaletniamu pa nieaściarožnaści mienš ciažkaha cialesnaha paškodžańnia».
Maksymalnaje pakarańnie, praduhledžanaje dadzienaj častkaj artykuła, - da troch hadoŭ abmiežavańnia voli. Za ciažkija cialesnyja paškodžańni abo śmierć dziciaci druhoj častkaj artykuła 165 praduhledžana da čatyroch hadoŭ pazbaŭleńnia voli.
