Kolkaść adkrytych vakansij u Minsku stała mienš amal u try razy ŭ paraŭnańni ź minułym hodam. U hetaj situacyi vakansii zabirajuć za ličanyja hadziny.
Tak, pracadaŭcy ładziać konkursny adbor navat na hruzčykaŭ, jakim prapanujuć 3-4 miljony rubloŭ u miesiac, udakładniaje namieśnik načalnika mižrajonnaha adździeła pracaŭładkavańnia «Pieršamajski, Saviecki, Centralny» Iryna Branaviec.
Kali z pačatku hetaha hoda ŭ bazie źviestak hetaha adździeła pracaŭładkavańnia naličvałasia bolš za 2500 vakansij, to za taki ž pieryjad 2014-ha hetaja ličba składała paradku 7300, pryvodzić statystyku Iryna Branaviec.
Tym časam štodnia ŭ mižrajonnym adździele pracaŭładkavańnia «Pieršamajski, Saviecki, Centralny» rehistrujecca ŭ jakaści biespracoŭnych 17-20 čałaviek, udakładniŭ jaho načalnik Siarhiej Laško. Pavodle jaho słoŭ, ažyjatažu niama. Da 6.00 nichto nie prychodzić, a paśla 17.00 rehistrujuć 3-5 čałaviek.
Biespracoŭnych rehistrujuć «praktyčna ŭsie śpiecyjalisty adździeła pracaŭładkavańnia». Pry hetym na afarmleńnie papier dla adnaho sychodzić da 40 chvilin — heta zaležyć ad kolkaści zapisaŭ u pracoŭnaj knižcy. Naprykład, u adnaho minčuka ŭ dakumiencie značylisia 72 zapisy.
Pry hetym čerhaŭ u staličnyja centry zaniataści, jakija z-za napłyvu biespracoŭnych z 3 červienia praciahnuli režym pracy, nie nazirajecca, rastłumačyŭ ahienctvu «Minsk-Naviny» Siarhiej Laško.
Pavodle jaho słoŭ, ludzi, jakich možna ŭbačyć ranicaj kala dźviarej, čakajuć nie adkryćcia centra, a aŭtobusa dla pajezdki na sielhaspracy.
«Mnohija, kali bačać ludziej u 7.45 ranicy kala ŭvachodu ŭ adździeł pracaŭładkavańnia, ličać, što heta čarha na rehistracyju, —źviarnuŭ uvahu Siarhiej Laško. — Heta nie tak. Nasamreč heta ludzi, jakija čakajuć aŭtobusa, kab adpravicca na sielhaspracy».
Štodnia 7-8 minčan pa kirunku adździeła pracaŭładkavańnia adpraŭlajucca na sielhaspracy ŭ kałhas imia Dziaržynskaha ŭ Minski rajon, kaža Siarhiej Laško.
Haradžanie čyściać siłasnyja jamy, dahladajuć svojskuju žyviołu, kosiać travu, nakryvajuć ciaplicy.
Patrebnyja pracoŭnyja ruki taksama ŭ fiermierskuju haspadarku «Družba i K», dzie na prapołku bulby, burakoŭ i morkvy hatovyja ŭziać bolš za 20 čałaviek.
Da miesca hramadskich rabot minčan dastaŭlajuć na aŭtobusie. Za pracu praduhledžana ździelnaja apłata.
Da prykładu, za prapołku harodniny možna zarabić da 100 tysiač rubloŭ u dzień. Kab trapić na hramadskija pracy, treba pryjści ŭ adździeł pracaŭładkavańnia pa miescy žycharstva.
Pahladzieć poŭny śpis apłatnych hramadskich rabot možna na sajcie Minharvykankama. Da prykładu, na 1 červienia ŭ im značyłasia 140 pradpryjemstvaŭ, jakija mieli patrebu ŭ rabočych rukach. Pry hetym bolšaść prapanoŭ była dla žadajučych zaniacca nie sielhaspracami, a uborkaj terytoryi.
