Sud Navabielickaha rajona Homiela 16 listapada vynies prysud byłomu zahadčyku dyspansiernaha adździaleńnia Homielskaj abłasnoj kliničnaj psichijatryčnaj balnicy. Pa sukupnaści artykułaŭ za atrymańnie chabaru i słužbovuju padrobku doktar pakarany čatyrma hadami pazbaŭleńnia voli z kanfiskacyjaj majomaści, ale pa amnistyi termin pakarańnia skaročany na adzin hod.
Doktar byŭ zatrymany ŭ svaim pracoŭnym kabiniecie paśla atrymańnia chabaru ŭ pamiery 200 dołaraŭ. Niezakonnaja ŭznaharoda pryznačałasia za afarmleńnie fiktyŭnaha miedycynskaha zaklučeńnia ab adsutnaści supraćpakazańniaŭ da kiravańnia aŭtatranspartam i vydaču adpaviednaha dakumienta. Usiaho było zafiksavana 12 epizodaŭ supraćpraŭnaj dziejnaści miedyka.
«Chabary davali nie tolki hrašyma, ale i sadavinaj, cukierkami, miasam. Samy bujny chabar — 200 dołaraŭ, inšyja chabary składali 500-700 tys. rubloŭ. Usie niezakonnyja prośby pacyjentaŭ datyčylisia dopusku da kiravańnia. Paźniej dvoje hramadzian, jakija davali chabar, paŭtorna prajšli kamisiju, i stała viadoma, što jany nie majuć prava pa stanie psichičnaha zdaroŭja kiravać transpartam. U pravaachoŭnyja orhany pastupiła ananimnaje paviedamleńnie, što doktar biare chabar, tamu pravodziłasia apieratyŭnaja praca. Na aŭdyja i videa zafiksavana, jak zahadčyk adździaleńnia namiakaŭ na davańnie chabaru, kab spryjalna vyrašyć pytańnie», — prakamientavaŭ BiełaPAN pamočnik prakurora Homiela Viačasłaŭ Bałocin, jaki padtrymlivaŭ abvinavačańnie ŭ sudzie.
Padčas śledstva na hlebie apošnich padziej u doktara adbyŭsia niervovy zryŭ, ale ekśpiertyza pryznała jaho ŭ stanie śviadomaści. Na sudzie zahadčyk adździaleńnia poŭnaściu pryznaŭ svaju vinu. Prysud pakul nie nabyŭ zakonnuju moc.
