Viačasłaŭ Kasinieraŭ dniami atrymaŭ paviedamleńnie ab uzbudžeńni kryminalnaj spravy pa fakcie naniasieńnia mienš ciažkaha cialesnaha paškodžańnia pry žorstkim zatrymańni jaho supracoŭnikami SACHR (śpiecyjalny atrad chutkaha reahavańnia ŭnutrannych vojskaŭ MUS Biełarusi) 11 žniŭnia hetaha hoda.
Jarasłaŭ Uljanienkaŭ, Maksim Piakarski i Viačasłaŭ Kasinieraŭ
Fihurant pa «spravie hraficistaŭ» uzhadvaje, što praz dva-try tydni paśla taho, jak jaho vypuścili ź lakarni, a złamanaja skivica ŭsio jašče była zašyniravanaja, Viačasłava vyklikała śledčaja Ju. Hramadskaja, jakaja vielmi doŭha i padrabiazna raspytvała, jak adbyvałasia jaho zatrymańnie.
«Roznymi namiokami sprabavali vyvieści mianie na toje, što mažliva mianie vypadkova začapili, kali adčyniali dźviery, ci moža ja niedzie tam paśliznuŭsia i złamaŭ skivicu ab leśvicu, ci moža ja ŭžo siadzieŭ u chacie sa złamanaj skivicaj i čakaŭ nalotu. Viadoma, što ŭsio było inakš, i ja heta padrabiazna adznačyŭ.
Jak potym akazałasia, na momant razmovy śledčyja ŭžo dahladzieli aŭtobus, u jakim mianie pieravozili, i tam niebyta znajšli maju kroŭ, a mnie navat abiacali zrabić vočnuju staŭku z tym SACHRaŭcam, jaki mianie źbivaŭ. Ale potym usio zacichła na miesiacy. I voś litaralna na dniach pryjšło paviedamleńnie pra toje, što ŭsio ž taki kryminalnaja sprava ŭzbudžana», - raspaviadaje Viačasłaŭ Kasinieraŭ.
Adnak, paciarpieły choča chadajničać, kab sprava była pierakvalifikavana, bo jon nie zhodny, što byli naniesienyja mienš ciažkija cialesnyja paškodžańni:
«Bolš za miesiac ja nie moh narmalna jeści, i liču, što heta treba kvalifakavać jak ciažkija cialesnyja. U mianie dahetul zastajecca pahroza invalidnaści, voś niedaŭna było zapaleńnie».
Juryst Pravaabarončaha centra «Viasna» Pavieł Sapiełka adznačaje, što stupień ciažkaści cialesnych paškodžańniaŭ ŭstaloŭvaje ekśpiert na padstavie ŭsiebakovaha daśledavańnia ŭsich akaličnaściaŭ, źviazanych z traŭmaj:
«Tamu da vyvučeńnia zaklučeńnia ekśpierta davać jakuju-niebudź acenku rana. Adnak, na moj pohlad jość kudy bolš važnaje akaličnaść, jakoje varta ŭličvać: cialesnyja paškodžańni pryčynienyja supracoŭnikam orhanaŭ unutranych spraŭ pry vykanańni im svaich abaviazkaŭ pry abstavinach, jakija śviedčać ab najaŭnaści prykmietaŭ słužbovaha złačynstva, praduhledžanaha č. 3 art. 426 KK - pieravyšeńnie ŭłady abo słužbovych paŭnamoctvaŭ. I adpaviedna, naŭmysnaje ździajśnieńnie słužbovaj asobaj dziejańniaŭ, jakija vidavočna vychodziać za miežy pravoŭ i paŭnamoctvaŭ, dadzienych jamu pa słužbie, spałučanaje z hvałtam, pakutaj ci abrazaj paciarpiełaha, karajucca pazbaŭleńniem voli na termin ad troch da dziesiaci hadoŭ z kanfiskacyjaj majomaści abo biez kanfiskacyi i z pazbaŭleńniem prava zajmać peŭnyja pasady abo zajmacca peŭnaj dziejnaściu».
Nahadajem, 11 žniŭnia piaciora chłopcaŭ byli žorstka zatrymanyja pa padazreńni va ŭdziele pa troch kryminalnych spravach: naniasieńniu biełaruska-moŭnych hrafici «Biełaruś maje być biełaruskaj» i «Revalucyja śviadomaści, jana ŭžo idzie…», a taksama zapeckvańniu farbaj sacyjalnaha bihborda z vyjavami supracoŭnikaŭ milicyi. Śledčy kamitet pradjaviŭ abvinavačvańni Maksimu Piakarskamu, Viačasłavu Kasinieravu i Vadzimu Žaromskamu pa č. 2 art. 339 «Chulihanstva, ździejśnienaje hrupaj asobaŭ». Zaraz termin papiaredniaha śledstva praciahnuty da 30 listapada biahučaha hoda.
