Kiraŭnik Rasturyzmu Aleh Safonaŭ daŭ učora intervju «Rasijskaj haziecie». Rasijski apazicyjny palityk Alaksiej Navalny pryvodzić u svaim błohu niekalki cytat ź jaho:
«Aleh Safonaŭ: Infrastruktura nie paŭstanie sama pa sabie, jaje nieabchodna raźvivać. Stvarać prefierencyi dla biznesu, pracavać nad palapšeńniem jakaści absłuhoŭvańnia turystaŭ. Tady ŭnutrany turpatok uzraście.
I jašče. My havaryli pra toje, što Rasija — paŭnočnaja kraina, što našy ludzi nie mohuć bieź ciapła i mora. Pa-pieršaje, pa klimatyčnych umovach Turcyi vielmi blizki Krym. Hety paŭvostraŭ moža prymać u dva razy bolš adpačyvalnikaŭ, čym ciapier, — da 10 miljonaŭ čałaviek u hod, u tym liku i za košt all inclusive.
Pa-druhoje, vydatny prykład raźvićcia infrastruktury haścinnaści, uśled za jakoj turpatoki pavialičvajucca ŭ razy, u tym liku i ŭ nizki, zimovy siezon, — Sočy. Na navahodnija kanikuły ŭ Sočy taksama amal usio raspradadziena. Heta značyć, tam, dzie stvoranaja jakasnaja infrastruktura, popyt raście.
Pa-treciaje, nieabchodnaść plažu i mora — heta šmat u čym naviazany stereatyp apošnich hadoŭ, jaki my ŭžo ŭsprymajem jak ułasnaje mierkavańnie. Našy prodki, navat zabiaśpiečanyja, nie jeździli masava na zamiežnyja mory.
RH: Tady zabiaśpiečanyja jeździli «na vody» u Hiermaniju, Francyju.
Aleh Safonaŭ: Maje prodki «na vody» nie jeździli. Jany byli zvyčajnymi sialanami, arali. Pry hetym vychavali narmalnych dziaciej i byli zdaraviejšymi, čym my ciapier.
U ZŠA 80 pracentaŭ hramadzian naohuł nikoli nie vyjazdžali za miažu, jany padarožničajuć unutry svajoj krainy. Pry hetym amierykancy jeździać nie tolki na plažy Majami. Jany adpačyvajuć u harach, la rek, naviedvajuć nacyjanalnyja parki. Ni ŭ ZŠA, ni ŭ Kitai, ni ŭ Kanadzie, darečy, jakaja pa klimatyčnych umovach blizkaja da Rasii, ni ŭ inšych krainach ź vialikaj kolkaściu nasielnictva niama takoha stereatypnaha ŭsprymańnia adpačynku jak vyklučna pajezdka na mora pa sistemie «ŭsio ŭklučana» i abaviazkova ŭ Turcyju».
«Možna (całkam spraviadliva) abłajać Safonava za hetaje tryźnieńnie, ale naša Luboŭ Sobal [juryst Fondu baraćby z karupcyjaj — NN] zrabiła hienijalnuju reč, — piša Navalny. — Jana prosta znajšła i apublikavała majomasnuju dekłaracyju Safonava.
U čuvaka viła na Siejšełach, a nam jon raspaviadaje pra zdarovych sialanskich dziaciej i pra toje, što pajezdki dla adpačynku na mora — heta stereatyp.
Poŭnaja dekłaracyja z usimi Miersedesami i Bentli tut».
Siońnia, 7 śniežnia, Safonaŭ paśpiašaŭsia raskazać kanału Dožd́, što ŭžo pradaŭ svaju nieruchomaść na Siejšełach.
«Kali ž havorka idzie pra maju dekłaracyju, to, tak, ja sapraŭdy vałodaŭ viłaj i domam na Siejšelskich astravach. U ciapierašni čas ja ich pradaŭ, ich u mianie ŭžo tam niama», — zajaviŭ jon.
