Za minuły hod na rynku adbylisia niemałyja źmieny. Nie raźličyŭšy svaje siły, likvidavałasia «Rodnaja staronka». Bolšaść kramaŭ sietki stali «Dabranomami», ale sankcyi z boku Ministerstva handlu dapamahli źniknuć i hetamu brendu. Prypyniali pracu i kramy «Mart Ina». Dla sietak, jakija žyvuć pieradusim ź vialikich abarotaŭ, heta moža być śmiarotna.
Zatoje praciahvaje razrastacca «Jeŭraopt». Za hod sietka dadała kala 100 kramaŭ, siarod jakich i byłyja «Rodnyja staronki». Ułaśniki kampanii, biznesmieny-emihranty Siarhiej Litvin i Uładzimir Vasilka, stvaryli nadzvyčaj efiektyŭnuju biznes-madel. U mnohich rehijonach «Jeŭraopt» faktyčna staŭ manapalistam. Słužba biaspłatnaj internet-dastaŭki za hod źjaviłasia va ŭsich abłasnych centrach, a ciapier razhortvajecca ŭ rajcentrach. I navat aŭtałaŭki, na stratnaść jakich narakała kiraŭnictva «Biełkaapsajuza», akazałasia paśpiachovym biznes-prajektam.
Roŭnyja i roznyja ceny
Vybar praduktaŭ u našym spažyvieckim košyku moža padacca dziŭnym. Tut ni chleba, ni małaka sa śmiatanaj. Tłumačeńnie prostaje: dla paraŭnańnia cikavyja tolki tyja pradukty, ceny na jakija adroźnivajucca ad sietki da sietki. Mnohija dla ekanomii biaruć małako ź minimalnaj tłustaściu — 1,5%. A ŭ kožnaj naviedanaj kramie jano pradajecca roŭna za 6600 rubloŭ.
Albo, naprykład, hłaziravanyja syrki. Žychary stalicy najbolš upadabali vanilnyja syrki ŭ zialonaj upakoŭcy ad Minskaha małočnaha zavoda №1— štodnia ich vypuskajecca kala 300 tysiač! Hety pradukt jość, badaj, u kožnaj kramie, ale cana vahajecca na ŭzroŭni 4100— 4400. Roźnica niepryncypovaja.
Zatoje harodninu i sadavinu kramy najčaściej zakuplajuć u roznych pastaŭščykoŭ. Ahurki z pamidorami možna znajści na luby hust — i biełaruskija, i tureckija, i hałandskija. Zdarajecca, cana adroźnivajecca ŭ paŭtara raza.
Cikava, na kolki ceńniki źmianilisia za hod. Banany ŭ siarednim kaštujuć 20 tysiač rubloŭ. Dla paraŭnańnia, letaś cana składała 12—13 tysiač rubloŭ.
Jak vyličvali lidaraŭ?
Jakuju mietodyku padlikaŭ my abrali? Naprykład, kiłahram pamidoraŭ u «Jeŭraopcie» pradajec- ca za 35900 rubloŭ. Heta najlepšaja cana siarod kankurentaŭ, značycca, krama atrymlivaje maksimalnyja 10 bałaŭ. Najdaražej pamidory kaštujuć u «Karonie» — možna znajści tolki pa 57900 rubloŭ za kiłahram. Hetaj kramie naličvajem 1 bał. Astatnija sietki atrymlivajuć pramiežkavyja bały praparcyjna roźnicy ŭ canie.
Zdarajecca, što niekatoryja kramy pryncypova nie pradajuć toj ci inšy tavar. «Vitalur» nie pracuje z rybaj u vakuumnaj upakoŭcy ad «Santa-Bremara», bo maje ŭłasnuju vytvorčaść. U takim vypadku kramy atrymlivali siarednija piać bałaŭ.
Trojka najlepšych u našym rejtynhu ŭ paraŭnańni ź minułym hodam nie źmianiłasia, tolki «Hipa» i «Prastor» pamianialisia miescami. Samymi tannymi kramami tym časam zastajucca «Jeŭraopty».
A voś «Karona» paćvierdziła imidž samaj statusnaj i darahoj sietki.
***
Asnoŭnyja handlovyja sietki Biełarusi
«Rodny kut» (Biełkaapsajuz) — tysiačy kramaŭ, pieravažna ŭ vioskach.
«Darors» (Biełčyhunka) — 74 drobnyja kramy Biełčyhunki ŭ Minsku (ahułam — bolš za 120).
«Jeŭraopt» — 57 kramaŭ u Minsku (ahułam — 394).
«Rubloŭski» — 51 krama ŭ Minsku (ahułam — 67).
«Susiedzi» — 30 kramaŭ u Minsku (ahułam — 51) + 11 kramaŭ «Ściažynka».
«Vitalur» — 34 kramy ŭ Minsku (ahułam — 39).
«Biełmarkiet» — 29 kramaŭ u Minsku (ahułam — 67).
«Hipa» — 9 kramaŭ u Minsku (ahułam — 12).
«Ałmi» — 9 kramaŭ u Minsku (ahułam — 41) + 8 kramaŭ «Zakrama»
«Mart In» — 6 kramaŭ u Minsku (ahułam — 31).
«Prastor» — 5 hipiermarkietaŭ u Minsku.
«Karona» — 4 hipiermarkiety ŭ Minsku (ahułam — 11).
