Ihar Łosik sa svajoj žonkaj Darjaj.
Papularnyja ŭ moładzievym internet-asiarodku asoby — internet-błohiery. Adzin z takich bajavych błohieraŭ — heta Ihar Łosik z Baranavič, jakoha ŭ tvitary čytaje bolš za 90 tysiač čałaviek. 90 tysiač! Bolš čym hazietu! Što heta za čałaviek?
Jak kaža pra siabie 23-hadovy Ihar, jon samy zvyčajny chłopiec, u jakoha baćki inžyniery, a dziady — sialanie.
«Dziacinstva prajšło zvyčajna: uroki prahulvaŭ, hojsaŭ u dvary, na leta jeździŭ da babuli pad Brasłaŭ. Ciapieraka tam mo nikoha i niama ŭžo, akramia «ałkaty». Taksama moj praprapradzied byŭ pisaram u Kaciaryny II», — skupa raskazvaje pra siabie Biełamova.
Chłopiec advučyŭsia na vykładčyka zamiežnaj movy ŭ BarDU, tam ža ŭ 20 hadoŭ znajšoŭ sabie žonku.
«Jašče da taho, jak zavieści tvitar, ja aktyŭničaŭ u sacyjalnych sietkach, — pryhadvaje Ihar. — Pieršy taki dośvied skončyŭsia hutarkaj z supracoŭnikami KDB. U 2011 hodzie, kali ŭsio kaciłasia ŭ tartarary, Dyjanaŭ stvaryŭ ruch «Revalucyja praz sacyjalnyja sietki» i paprasiŭ usich udzielnikaŭ prydumać, jak biez kryvi zmahacca z uładami.
Ja tady zrabiŭ prapanovu: a što, kali mirna źbiracca na hałoŭnaj płoščy horada štosieradu? Dyjanavu ideja spadabałasia, jon zrabiŭ mianie administrataram supołak, i my pačali raskručvać zadumu. U vyniku ludziej pačało šmat vychodzić, i ŭ milicyi nie było padstavaŭ ich zatrymlivać.
Kali ŭžo pačali vychodzić nie tolki ŭ Minsku, a ŭ Baranavičach, Lepieli, Hrodnie, hetym ščylna zanialisia ŭ KDB. Vyličvali administrataraŭ supołak, prychodzili dachaty, cisnuli. Vyličyli i mianie, ja tady vučyŭsia na pieršym kursie, kinuli na stoł usiu maju pierapisku «UKantakcie», dzie ja łajki staviŭ, dzie što kamientavaŭ. Ale jany nie viedali, što ja byŭ aŭtaram idei, tamu tolki pryhrazili, što ŭ maich baćkoŭ buduć prablemy na rabocie, a ja siadu ŭ turmu, kali nie spyniusia.
Tak «abiasškodzili» mianie, a potym i ŭsich astatnich. Bo płanavałasia, što na 3 Lipienia budzie vystupać Łukašenka, my zrobim anons, vyjdzie šmat ludziej i jaho aśviščuć, ale my da taho momantu nie daciahnuli, pratest źliŭsia».
Paśla Ihar jašče raz sprabavaŭ zrabić štości «UKantakcie» i stvaryŭ supołku, dzie žartavaŭ pra biełaruskuju palityku. Ale jak tolki tam nabrałasia 4 tysiačy padpisantaŭ, da chłopca znoŭ pryjechali z KDB, ale ŭžo minskaha, i znoŭ «paprasili» spynicca, pahra-žajučy represijami.
Paśla hetaha, maŭlaŭ, Ihar i zavioŭ tvitar-akaŭnt. Pra što pisać — jakraz pačałasia «Bałotnaja». «Ja pisaŭ ab pratestach u Maskvie, pościŭ karcinki ź videa, heta zaŭvažyŭ papularny rasijski błohier Kašyn i pačaŭ na mianie spasyłacca. Potym ja pažartavaŭ i stvaryŭ fejkavy akaŭnt Saładuchi, na što pavialisia ŭsie biełaruskija ŚMI. Mienavita tak ja i raskruciŭsia», — kaža Biełamova i dadaje, što pik jahonaj papularnaści prypaŭ na časy Majdanu i pačatku vajny va Ukrainie.
«Pisaŭ pra Majdan, ale kali Rasija akupavała Krym, to sapraŭdy spałochaŭsia, što takoje ž moža adbycca ź Biełaruśsiu», — pryznajecca Ihar i raskazvaje, jak jaho aburyła rasijskaja prapahanda.
«Hetyja historyi pra ŭkryžavanych chłopčykaŭ, inšy płot ź lebiady, ad jakoha šalejuć ludzi… Ja hladzieŭ rasijskija kanały i afihievaŭ prosta. Tady zrazumieŭ, što ŭ nas pavinna być svaja kontrprapahanda, albo stracim mazhi moładzi. Pačaŭ vy- kryvać rasijskuju chłuśniu, zrabiŭ minułym letam padborku fejkaŭ rasijskaj prapahandy, jakaja šyroka razyšłasia pa śviecie — šmat ŚMI pieradrukavali, navat zamiežnych», — kaža Ihar i dadaje, što ličyć siabie prapahandystam zdarovaha sensu, jaki vykałačvaje «savok» z hałovaŭ ludziej.
«Ale paśla Ukrainy nieŭzabavie padyšła našaja čarha — Rasija zajaviła, što raźmieścić tut bazu. Ludzi ž nie razumiejuć, što z hetaha pačynajucca vojny, tamu my ź inšymi błohierami padumali i vyrašli zapuścić u tvitary chešteh #norussianbaseinbelarus, kab danieści ryzyku da ŭsich. Nu i što? Heta pašyrałasia, źjavilisia tysiačy dopisaŭ z hetym teham «UKantakcie», u instahramie, tvitary, fejsbuku.
A praź niekalki dzion Statkievič zładziŭ akcyju ŭ centry Minska, a jašče praź niekalki dzion Łukašenka kaža, što hetaja baza niepatrebnaja.
Ja dumaju, što my tym samym dali jamu kozyr u ruki ŭ pieramovach z Kramlom: maŭlaŭ, Vałodzia, nu ty ž bačyš, ludzi suprać»
A potym usia kraina padtrymała jastrambielskich kadetaŭ, jakija apranuli majki z «Pahoniaj». Biełamova i tut pašyraŭ dopisy z chešteham #PahoniaPobač u padtrymku chłopcaŭ.
«Džon Silvier z 1863ch.com pieršy napisaŭ pra kadetaŭ, a ja padtrymaŭ. I ŭ vyniku ŭsie viedajuć, što praź infarmacyjnuju chvalu tuju vučelniu zavalili listami, sotni biełarusaŭ fotkalisia ŭ majkach z našym nacyjanalnym hierbam, i nivodnaha z kadetaŭ nie vyklučyli», — kaža Ihar i praciahvaje dalej pra svaich kaleh.
«Uvohule, toj ža Džon Silvier — vialikaja pavaha jamu. Ja bačyŭsia ź im asabista i viedaju, što jon vielmi paciarpieŭ ad śpiecsłužbaŭ, navat u psichušcy daviałosia pasiadzieć. Ciapier jon žyvie ŭ Kijevie, nie sałodka tam jamu. Anton Matolka taksama dobry chłopiec. Uvohule, ja miarkuju, što našaje hramadstva samo zdolna naradžać aktyŭnych i kreatyŭnych ludziej, jakija nie daduć Biełarusi źniknuć. Hlańcie chacia b na «Art-siadzibu». Hetyja chłopcy za adzin hod viarnuli modu na ŭsio nacyjanalnaje. Ja navat u Baranavičach letam bačyŭ moładź u sakołkach z «Pahoniaj», u vyšyvankach i ź biełaruskimi stužkami», — pierakanany Ihar.
Na skančeńnie chłopiec dadaje, što ŭ budučyni choča być žurnalistam i nadalej pracavać dla papularyzacyi biełaruščyny. Ale jon nie rusafob, jak mnohija kažuć. «Dla mianie ŭsie ludzi dobryja, ja tolki idei nie prymaju. Mianie nazyvajuć rusafobam, ale ja pucinafob, u mianie fobija pucinizmu. Ja nie prymaju tych, što nie ličyć Biełaruś za krainu, chto nazyvaje nas ruskimi. Takich ludziej u Biełarusi nie šmat, i moj abaviazak ich vypravić. Budučynia za patryjotami Biełarusi, bo staryja «saŭki» chutka syduć — ich užo sam čas nie prymaje i vykidaje na ŭzbočynu, jak heta vidać va Ukrainie. Ja ŭpeŭnieny, što my stvorym sapraŭdnuju jeŭrapiejskuju krainu».
