Administracyja BDU nie płanuje admianiać płatu za pierazdaču akademičnaj zapazyčanaści. Takuju vysnovu možna zrabić pa vynikach sustrečy rektara sa studentami, jakaja prajšła 30 śniežnia ŭ Minsku, paviedamiŭ BiełaPAN adzin ź jaje ŭdzielnikaŭ.
Pavodle jaho słoŭ, na sustreču pryjšło niekalki studentaŭ, z kožnym ź jakich rektar VNU Siarhiej Abłamiejka i jašče dva pradstaŭniki administracyi razmaŭlali indyvidualna.
Student adznačyŭ, što na sustreču zapisałasia kala 30 čałaviek. Płanavałasia, što studenty zmohuć uźniać pytańni, jakija ich chvalujuć: admienu płatnych pierazdač, nacisk na aktyvistaŭ studenckaha ruchu, stvareńnie realnaha orhana studenckaha samakiravańnia. Student skazaŭ, što zmoh abmierkavać usie hetyja temy, adnak na kožnaje pytańnie «atrymaŭ farmalny karotki adkaz».
«Rektar nastojvaŭ, — skazaŭ student, — što ŭ BDU niama nacisku na aktyvistaŭ ruchu «Studenty suprać», a studenckaje samakiravańnie pracuje efiektyŭna. Rektar taksama skazaŭ, što rašeńnie ab uviadzieńni płaty za pierazdaču akademičnaj zapazyčanaści prymałasia nie ŭ VNU, a «naviersie».
Surazmoŭca BiełaPAN adznačyŭ, što niekatoryja studenty, jakija chacieli trapić na sustreču z rektaram, nie pryjšli na jaje, bo pajšli na sud nad studentam fiłfaka BDU Hlebam Vajkulem. Jon abvinavačvaŭsia va ŭdziele ŭ niesankcyjanavanym masavym mierapryjemstvie — studenckim maršy, jaki prajšoŭ 2 śniežnia ŭ Minsku, i byŭ aštrafavany na 3,24 młn. rubloŭ.
