1 studzienia ŭ hałoŭnaj VNU Biełarusi — Biełaruskim dziaržaŭnym univiersitecie — nabyło moc pałažeńnie ab apłacie paŭtornaj zdačy zalikaŭ i ekzamienaŭ.
Pałažeńnie «Ab arhanizacyi atestacyi asob, jakija nie zdali ekzamieny, zaliki, nie prajšli inšyja formy kantrolu vynikaŭ vučebnaj dziejnaści, praduhledžanyja vučebnymi płanami, i likvidacyi roźnicy ŭ vučebnych płanach u Biełaruskim dziaržaŭnym univiersitecie» zaćvierdžana zahadam rektara BDU Siarhieja Abłamiejki 12 listapada.
Košt adukacyjnych pasłuh, jakija akazvajucca pry likvidacyi akademičnaj zapazyčanaści i akademičnaj roźnicy ŭ vučebnych płanach dla biełaruskich hramadzian, składaje: za pierazdaču ekzamienu (dyfierencyravanaha zaliku) u prafiesara — 53 tys. rubloŭ, dacenta — 50 tys., vykładčyka biez navukovaj stupieni — 47 tys., zaliku — 37, 35 i 33 tys. adpaviedna.
Kiraŭnictva vykanańniem i abarona kursavoj raboty acenienyja ad 516 tys. rubloŭ (pad kiraŭnictvam vykładčyka biez navukovaj stupieni na pieršym kursie) da 945 tys. (pad kiraŭnictvam prafiesara na piatym kursie), a kiraŭnictva vykanańniem i abarona dypłomnaj raboty (prajekta) — ad 2 młn. 732 tys. da 3 młn. 24 tys. adpaviedna.
Samaja darahaja pasłuha pry likvidacyi akademičnaj zapazyčanaści i akademičnaj roźnicy — kiraŭnictva vykanańniem i abarona mahistarskaj dysiertacyjnaj raboty: 3 młn. 745 tys. pad kiraŭnictvam prafiesara.
Uviadzieńnie płaty za likvidacyju akademičnaj zapazyčanaści administracyja BDU abhruntavała normami zakanadaŭstva, u pryvatnaści Kodeksa ab adukacyi. «U bazavy košt atrymańnia jak adukacyi, jakaja finansujecca ź dziaržaŭnaha biudžetu, tak i adukacyi, jakaja ažyćciaŭlajecca za košt ułasnych srodkaŭ hramadzian, uvachodzić tolki adnarazovaja zdača zalikaŭ i ekzamienaŭ. U vypadku ŭźniknieńnia akademičnaj zapazyčanaści zakanadaŭstva traktuje takuju pierazdaču jak adukacyjnuju pasłuhu, jakaja pavinna akazvacca pry ŭmovie kampiensavańnia jaje koštu», — paviedamiła pres-słužba BDU. Pry hetym źviartałasia ŭvaha na toje, što płata za paŭtornuju zdaču zalikaŭ i ekzamienaŭ užo daŭno ŭviedzienaja ŭ bolšaści biełaruskich VNU.
Uviadzieńnie płatnych pierazdač stała pryčynaj niezadavalnieńnia studentaŭ.
Aktyvisty ruchu «Studenty suprać» sabrali niekalki tysiač podpisaŭ za admienu hetaha rašeńnia i praviali 2 śniežnia ŭ Minsku marš pratestu. Jany patrabavali admieny normy ab płatnych pierazdačach i ŭviadzieńnia miechanizmu realnaha samakiravańnia ŭ BDU.
30 śniežnia niekalki studentaŭ-aktyvistaŭ sustrelisia z rektaram Abłamiejkam. Jany ŭzdymali prablemnyja pytańni, ale, jak paviedamiŭ BiełaPAN adzin z udzielnikaŭ sustrečy, atrymali farmalnyja adkazy. Paśla sustrečy stała zrazumieła, što administracyja BDU nie płanuje admianiać płatu za pierazdaču akademičnaj zapazyčanaści.
