Hazapierapracoŭčaja i naftachimičnaja kampanija «Sibur» atrymała bujny kredyt u pamiery 1,75 młrd dalaraŭ z Fondu nacyjanalnaha dabrabytu (FND) pad nizki pracent. Srodki pojduć na finansavańnie budaŭnictva novaha zavoda ŭ Tabolsku.
Saŭładalnikam «Sibura» źjaŭlajecca Kirył Šamałaŭ, jakoha ŚMI nazyvajuć mužam dački Uładzimira Pucina Kaciaryny Cichanavaj, paviedamlaje ahienctva Reuters.
Kirył Šamałaŭ daje intervju, 29 lipienia 2015 hoda. Fota Dźmitryja Duchanina, Reuters / Kommersant
Pavodle karparatyŭnych dakumientaŭ, jakija patrapili ŭ ahienctva, «Siburu» ŭdałosia atrymać hety kredyt pad 2% hadavych, u toj čas jak na rasijskim rynku najmienšy pracent pad takija sumy składaje 7%.
Kirył Šamałaŭ na zapyt Reuters kamientara nie daŭ. «Sibur» nie maje nijakaj infarmacyi «ab siamiejnych suviaziach ci suviaziach pamiž akcyjanierami kampanii i prezidentam Rasii», zajaviŭ ahienctvu pradstaŭnik kampanii. U «Sibury» taksama padkreślivajuć, što pryciahnieńnie srodkaŭ FND prajšło ŭsie nieabchodnyja pracedury i było zaćvierdžana ŭ strohaj adpaviednaści z zakanadaŭstvam.
Pradstaŭnik Minekanamraźvićcia zajaviŭ, što kupla ablihacyj «Sibura» u rublovym ekvivalencie była vyhadnaj ździełkaj, a inviestycyi dziaržavy ŭ prajekt buduć spryjać pryciahnieńniu zamiežnaha finansavańnia.
«Sibur Chołdynh» — najbujniejšy naftachimičny chołdynh Rasii, jaki zajmajecca pierapracoŭkaj spadarožnaha naftavaha hazu, vałodaje infrastrukturaj pa jaho pierapracoŭcy i transparciroŭcy, vypuskaje bazavyja palimiery, polietylen, poliprapilen i h.d.
Asnoŭnym akcyjanieram źjaŭlajecca kiraŭnik praŭleńnia «Navateka» Leanid Michielson (50,2%), člen rady dyrektaraŭ «Sibura» Kirył Šamałaŭ kantraluje 21,3% — jon staŭ ich ułaśnikam paśla taho jak ažaniŭsia z dačkoj Pucina, Hienadź Cimčanka — 15,3%, byłyja i ciapierašnija mieniedžary kampanii — 13,2 %.
U listapadzie Reuters paviedamiŭ, što Kirył Šamałaŭ z 2013 hoda žanaty z Kaciarynaj Cichanavaj, jakaja źjaŭlajecca dačkoj prezidenta Uładzimira Pucina.
Heta paćvierdziŭ kiraŭnik «Hazmprambanka» Andrej Akimaŭ, pisała ahienctva. Paśla vychadu artykuła pres-słužba «Hazprambanka» zajaviła, što Akimaŭ nie rabiŭ zajaŭ ab rodnasnych suviaziach Cichanavaj i «byŭ vielmi ździŭleny» tym, što žurnalisty dapuścili «pramuju padtasoŭku». U Reuters vyklučyli mahčymaść niekarektnaj interpretacyi i paviedamili, što bankir raspaviadaŭ pra Cichanavu pad zapis.
Paźniej Reuters apublikavała rasśledavańnie pra Šamałava «Tavaryski kapitalizm: čałaviek ažaniŭsia z dačkoj Pucina i potym razbahacieŭ». Ahienctva śćviardžała, što stan biznesmiena pačaŭ imkliva raści nieŭzabavie paśla jaho viasiella.
Šamałaŭ zaniaŭ kresła vice-prezidenta pa administracyjnaj padtrymcy biznesu «Sibura» u 26-hadovym uzroście.
Kampanija ŭ 2008 hodzie akurat šukała čałavieka, adkaznaha za suviazi ź dziaržaŭnymi orhanami, i Šamałava zaprasili na hetuju pasadu. Kali ŭ «Sibury» źjaviłasia apcyjonnaja prahrama, Šamałaŭ siarod inšych kalehaŭ kuplaŭ akcyi i da vosieni 2014 hoda sabraŭ bolš za 4% kampanii.
Adnak rezka jaho pakiet vyras u vyniku ździełki ź Cimčankam: u pačatku vieraśnia 2014 h. Šamałaŭ kansalidavaŭ 21,3% akcyj, u Cimčanki zastałosia tolki 15,3%.
U intervju vydańniu «Kommiersant» Kirył Šamałaŭ śćviardžaŭ, što finansavaŭ ździełku, uziaŭšy kredyt u «Hazprambanku» pad zakład aktyvaŭ, jakija jamu naležali (jakich mienavita i kolki dakładna, u intervju nie ŭdakładniałasia).
Baćkam imaviernaha muža dački prezidenta Rasii źjaŭlajecca Mikałaj Šamałaŭ, jaki trapiŭ, darečy, u 2014 hodzie pad sankcyi Jeŭrasajuza, ułady jakoha uklučyli biznesmiena ŭ bližejšaje atačeńnie Pucina, abhruntavaŭšy heta tym, što abodva byli suzasnavalnikami dačnaha kaapieratyva «Voziera».
Mikałaj Šamałaŭ sapraŭdy siabruje z Pucinym, i navat byŭ sioleta ŭ jaho na dnie narodzinaŭ, što paćvierdziła krynica RBK ŭ kramloŭskaj administracyi (pres-sakratar prezidenta Dźmitryj Piaskoŭ heta nie kamientuje).
U 1990-ja Šamałaŭ-starejšy pracavaŭ stamatołaham, paśla čaho pačaŭ zajmacca pastaŭkami miedycynskaha abstalavańnia.
